Shillong, Naitung 09
Ka Risa Colony SC lem bad ka Mawphlang SC ki la jop ha ka lympung ïalehkai Under-20 Fourth Division ba la pynïaid da ka Shillong Sports Association ha ka sngi B-ar.
Ha ka jingïakhun jong ka Group-E kaba la long ha SSA Stadium kaba ha First Ground Polo, ka Risa Colony ka la pynliem noh ïa ka Laitumkhrah SC da 2-1 kol. ïa kine la thep da u Firstjohnpaul Khyriem ha ka minit kaba 49 bad u Damanshwa Marboh ha ka minit ba 65, katba na ka liang ka Laitumkhrah ka la lah ban pynphai kylla shi kol lyngba u Sankin Lynser ha ka minit ba 60.
Haba phai pat sha kawei pat ka jingïakhun jong ka Group-F kaba la long ha madan MFA, ka Mawphlang SC ka la pynliem noh ïa ka Mawkasiang SC da 3-2 kol. Ïa kine la thep da u Damutskhemlang Kharsahnoh ha ka minit kaba 26, Bankit Kurbah (58) bad u Firstborn Synrem (68), katba na ka Mawkasiang la thep da u Westernroy Nongrum (24) bad u Teiborlang Khongjee (32).
Kane ka lympung kan bteng biang ha ka sngi Balang ha kaba ka Golflink SC kan ïakhun pyrshah ïa ka Nongthymmai Raitnongkynrih SC ha ka SSA Stadium, katba Umsohsun SC ïa ka Mawlynrei SC ha madan MFA. Kine ki jingïakhun kin long ha ka por 4 baje janmiet.
