Shillong, Naitung:
Ka Shongknor jong ka National Commission for Women (NCW), ka Rekha Sharma ha ka Lah Sngi U Blei ka la ong ba ka Thaiñ Shatei Lam Mihngi ka long ka jaka kaba shngaiñ na bynta ki kynthei haba nujor bad ki jaka thor jong ka ri.
“Kane ka dei namarba ki kynthei mynta ki la tip shaphang ki hok jong ki bad ki la wan shakhmat ban kren. Namarkata ngi ïohi ba ki kam thombor pyrshah ïa ki kynthei ngi i kumba ka kiew,” la ong ka Sharma haba kren sha ki lad pathai khubor halor ka jingnang kiew ki kam thombor pyrshah ïa ki kynthei hapoh ka Jylla.
Ka la ong ruh ba ki lad pathai khubor ki trei minot ban pyni sha ka pyrthei halor ki kam thombor kiba jia pyrshah ïa ki kynthei, kumjuh ki pulit ki trei shitom ban pynngat ïa ki ‘riew be-aiñ ha ki mukotduma bapher-bapher.
Haba kubur ba ki jingkheiñ haba ïadei bad ki kam thombor pyrshah ki kynthei ki kiew, ka Sharma ka la pynsngew halor ka jingdonkam ban ïatreilang ha baroh ki liang.
“Nga lah ban ong ba ka Thaiñ Shatei Lam Mihngi ka dang long ka jaka kaba shngaiñ na bynta ki kynthei haba nujor bad ki jaka thor ka India ne ka phang Shatei ka India. Ha kine ki jaka, ki jingjia kiba kynthup ïa ki jingshah leh dusmon ki kynthei ki kham jyllei,” ka la ong.
Ha kajuh ka por, ka Shongknor ka la ban jur halor ka jingdonkam ban ïai minot ha ka kam khnang ban pyntikna ba kan ym don wat tang kawei ruh ka mukotduma ba ïadei bad ki kam thombor pyrshah ïa ki kynthei bad ba ki kynthei kin ïoh ïa ka jingshngaiñ bad jingïada ha kano-kano ka bynta jong ka ri.
Haba kdew ba kawei na ki dkhot ka NCW ka dei napoh ka Jylla – Kong Delina Khongdup, ka la ong ba dei ma ka (Khongdup) kaba khmih ïa man la ki jingjia ba ïadei bad ki kam thombor pyrshah ki kynthei ym tang jong ka Jylla, hynrei jong man la ki Jylla ka Thaiñ Shatei Lam Mihngi.
Ha kawei ka liang, ka Sharma ka la ïathuh ba ka NCW ka ju pynlong ruh ïa ki ‘Legal Awareness Program’ ha baroh kawei ka ri la 3 snem mynta ha ryngkat ka jingïatreilang bad ka National Legal Services Authority (NALSA) bad mynta u snem ruh kan pynlong ïa kine ki prokram ha kylleng ka ri bad ha man la ki distrik jong ka Thaiñ Shatei Lam Mihngi khnang ba ki kynthei kin tip shaphang ki hok jong ki bad kin wan shakhmat haba ki ïakynduh ïa kano-kano ka jingeh.
“Kiba bun kim tip ba ki shah thombor ha ki ïing ki sem namar ki la mad la slem ïa kane bad ki sngew ba kane ka long shi bynta jong ka jingim. Ngi dei ban pynsngewthuh sha ki ba kane ka dei ka jingthombor pyrshah ïa ki bad ki dei ban pynsawa ïa ka sur,” la ong katei ka khlieh ka NCW.
Shuh shuh ka la bynrap ba ka NCW ka ju pynlong ïa kiba bun ki prokram ai jinghikai bad lympung ïamir jingmut na ka por sha ka por ha ka Thaiñ Shatei Lam Mihngi.
