Shillong, Naitung 09
Ka jingïalang jong ka Executive Committee (EC) ka Khasi Hills Autonomous District Council (KHADC) kaba la long ha ka Sngi Ba-ar, ka la shim ïa ka rai ba kan wanrah ïakren ïa ka kaiphod jong ka Delimitation Committee (DC) ha ka sngi sdang ïa ka dorbar lyiur jong ka KHADC ka ban sdang ha ka 10 tarik mynta u bnai.
Ka jingwanrah ïa katei ka kaiphod ka long ban ïakren halor ban pynbeit ryntih ïa ki shnong ha ki MDC Konstitwensi bapher bapher, ïa kaba ka delimitation committee ka la dep ban pynbit pynbiang.
Haba kren sha ki lad pathai khubor hadien ba la wai ka jingïalang, u Deputy Chief Executive Member ka KHADC u Bah Pynshngaiñ N Syiem u la ong, ka jingïalang ka la shim ïa ka rai ba yn wanrah ïa katei ka kaiphod jong ka delimitation committee katkum ka Amendment Rules ki Autonomous District Council.
U la ong ba ka phang treikam jong ka Delimitation Committee hi ka long ban pynïaryntih katba lah ïa ka jingdon ki nongthep ‘vote’ ha ki Konstitwensi da kaba ai nuksa ba ka Mawlai MDC Konstitwensi ka dei kaba la bun eh ki nongthep ‘vote’ bad kin don ki shnong ki ban hap noh sha ki MDC Konstitwensi ba marjan.
Haba kylli ba hato lada ka ïingdorbar ka KHADC ka mynjur ïa ka kaiphod jong ka Delimitation Committee? Hato kan don noh ka ilekshon mar ïa kut ka jingpynjlan ba hynriew bnai ïa ka samoi treikam ka ban sa kut ha u bnai Nailur, 2024? U Bah PN Syiem u la ong ba kane kan shong ha u Lat bad kumjuh ruh ha ka Sorkar Jylla ban shim ïa ka rai la kan pynlong noh ïa ka ilekshon ne kumno ban ïaid shakhmat.
