Montevideo, Uruguay:
Ha kane ka jingjia, la ong ba baroh shiphew (10) ngut ki tymmen kiba sah ha kawei ka iing ai jingsumar ha Uruguay ki la duh noh ia ka jingim ha ka Sngi U Blei namar ka jingkem ding katei ka iingmala ha ka por mynstep, ha kaba tang uwei u nongsumar u la lait phet bad lait im na kane jingjia.
Napdeng jong kitei ki 10 ngut, 8 ngut ki dei ki kynthei bad 2 ngut pat ki shynrang bad la ong ba kitei ki 10 ngut ki la shu duh kyndit ia ka jingim jongki ha katei ka jingjia ka bym poi pyrkhat bad ha katei ka iing kaba don don 6 tylli ki kamra bad katei ka jaka sumar tymmen ka don hapoh ka nongbah Treinta y Tres sha ka thaiñ Mihngi jong ka South America.
La ong ba ka long kaba donbok ba utei u nongsumar uba dang 20 snem ka rta, u la iohlad ban phet noh da kaba suk lyngba ka jaka buh kali jong katei ka iing.
Ha katei ka jingjia, la ong ba hynriew ngut na ki nongshong shnong katei ka jaka, ki la khlad noh tang namar ka jingioh ring mynsiem ia ka tdem kaba mih na katei ka jaka, katba ia lai ngut kiwei pat, la pynkit mardor sha ka jaka sumar kaba don ha katei hi ka thaiñ, hynrei la ong ba ki bor pynïaid kim shym la lah shuh ban pyllait im ia ki namar katei ka jing-ioh ring mynsiem ia katei ka tdem kaba mih na katei ka jaka.
