Shillong, Naitung:
Ka Shongknor jong ka National Commission for Women (NCW), ka Rekha Sharma ka la ong ba ki kynthei la ka long ha ka liang ka lariti ne ki khana mynbarim, ki dei ki nongri-nongda ïa ki khlaw ki btap.
Ka Sharma ka la pynkynmaw ruh ïa ka ‘Chipko Movement’ ha Uttarakhand ha kaba ki kynthei ki la don bynta ha ka ban khang ïa ka jingpynkhyllem dieng.
“Ha baroh ki jaka ‘riewlum, dei ki kynthei kiba ïada ïa ki khlaw bad ki jingdon-jingem jong ki,” la ong ka Sharma haba ai jingkren ha ka ‘Capacity Building Workshop’ halor ka phang, “Promoting Entrepreneurship among Indigenous Women of NER based on Non-Timber Forest Product” kaba la long ha ka Lah Sngi U Blei.
Ka la ong ruh ba la ka dei ka kam thoh dieng ne ka jingwad bam ïa ki jingri-jingdup ha khlaw, ki kynthei ki don bynta ha ki kam bylla.
“Hynrei haba phai sha ka ban kamai pisa ne kiwei-kiwei kim kam kiba hap ban khmih ban peit, ki kynthei kim don,” la ong ka Chairperson da kaba bynrap ba ka NCW ka don ka jingïohi jngai ba ki kynthei ki dei ban don bynta ha man la ki kam ba ïadei bad ki khlaw ki btap khamtam haba ki sdang ïa ki kam lajong.
Ha kajuh ka por, ka la ong ba 50% na ki kynthei ki dei ban don bynta ha ki kam ba khmih ba peit.
“Ka kam ban shim rai ruh ka dei ban shong ha kti ki kynthei bad dei hangta ba ki kam kin sa manbha na bynta kito khamtam na ki jaka ‘riewlum,” ka la ong.
Ka la ong ruh ba ki Self Help Group (SHG) ki don la ki kam khaïi barit bad kumta dei ban leh eiei ban pynïar ïa ka kam jong ki lyngba ka ‘Capacity Building’ jong ki kynthei.
Ka Sharma ka la ong ba ki kynthei ki leit sha khlaw ban thoh dieng bad wad bam na bynta ki jingri-jingdup da kaba buh jingma la ka jingim hynrei wat la katta, kim ïoh ïa ka jingïoh kaba ki dei ban ïoh.
“Ngi dei ban hikai ïa ki kumno ban pyndonkam ïa ki mar bapher-bapher kum ki jingthung kynbat kiba bun ha khlaw ban shna dawai ne kiwei-kiwei ki jingtah pynbhabriew,” la ong katei ka khlieh ka NCW.
Shuh shuh ka la bynrap ba dei ban hikai ruh ïa ki kynthei kumno ban pynïaid ïew bad song bha ïa ki mar hashuwa ban die bad kdew ba dei ban pynsuk ïa ki ha ban ïoh ïa ki ram khnang ba ki lah ban sdang ïa ki kam lajong.
