Nongstoiñ, Naitung 09
Ki pulit ka Nongstoiñ ki la kem noh ïa u Albertstar Nongphud, 43 snem ka rta, uba la thang ïa la ka ïing, ki tiar ki tar, ki jaiñ ki nep bad wat ïa ki kot skul jong ki khun.
Ka khubor na ki heh pulit ka District, la ïathuh ba ïa utei u rangbah la kem noh ha ka Sngi Saitjaiñ bad mynta ki la dep ban phah sha Judicial Custody bad ka jingtohkit ka dang ïaid shakhmat.
Lah ban kdew hangne ba katei ka la jia ha ka shnong Phudumbah Sepngi, West Khasi Hills ha ka 5 tarik mynta u bnai ha ka por 1 baje shiteng synñia. Utei rangbah shwa ban thang ïa ka ïing u la sei shwa ïa ki tiar ki tar sha phyllaw ïing bad hadien kata u la thang shisyndon ïa ki. Katei ka ïing kaba u thang ka bym shym la ing lut ka dei ka ïing lajong kaba u shong bad ka kurim lem bad ki khun ki kti.
Shuh shuh ban pynkynmaw biang halor katei ka jingjia, ha ka 5 tarik mynta u bnai na ka liang ki bahaïing na ka shnong Phudumbah Sepngi ki la leit ban ujor da ka ejahar ha thanat Nongstoiñ.
