Shillong, Naitung 09
Ka lahduh jong u snem ba la lah, ka Assam Rifles Public School na East Khasi Hills ka la jop ha kaba sdang ïa ka lympung ïalehkai State Level Subroto Mukherjee Cup Football Tournament 2024 ba la pynïaid da ka tnat ïalehkai jong ka Sorkar Jylla ha ka sngi Ba-ar.
Ha kane ka jingïakhun jong ka Under-17 ki shynrang kaba la long ha madan MFA, ka Assam Rifles ka la pynliem noh ïa ka Monfort Seconday School na West Garo Hills da 4-1 kol. Kane ka nam jop ka la wan lyngba ka hat-trick na u Ricky Kharkongor hadien ba u la thep ha ka minit kaba 6, 27 & 53 bad ïa kawei pat la pynbud da u Phermanbha Lyngdoh (44). Na ka liang ka Monfort ka la pynphai shi kol lyngba u Dongkam M. Marak (29).
Ka Sibsingh Memorial Govt. HSS (West Khasi Hills) ka la shah rem da 2-0 kol ha ka Songsak Agilogre HSS (East Garo Hills). Ïa kine la thep da u Bipiush Marak ha ka minit kaba 4 bad ïa kawei pat la pynbud da u Vrikam Sangma ha ka minit ba 52.
Ka North Liberty HSS (West Jaiñtia Hills) ka la lah ban pynliem noh ïa ka Lotus SS (East Jaiñtia Hills) da 3-1 kol. Kane ka la wan lyngba ka hat-trick ba la khur da u Rio Marboh hadien ba u la ïoh ban thep marwei haduh saw kol (8,11,32 & 51). Hynrei ka Lotus ka la pynphai kylla lyngba u Vishal Lyngdoh (46).
Ka Okapara SS (Southwest Garo Hills) ka la shah rem noh ha ka Tenset SS (South West Khasi Hills) da 2-1 kol. Kane ka nam jop ka la wan urlong lyngba u Aiborlang Kharjahrin (2) bad u Badapjingkyrmen Nongrum (24), hynrei u Weltin S. Sangma (50) u la lah ban pynphai kylla shi kol ïa ka Okapara.
Ha ka kyrdan ïalehkai Under-15 ki shynrang ha SSA Stadium, ka Dapborlang Giri Memorial SS (West Khasi Hills) ka la pynliem noh ïa ka Khliehriat Presbyterian HSS (East Jaiñtia Hills) da 4-0 kol. Ïa kine la thep da u Aiborlang Sangriang (2), Savio Kupar Marweiñ (12), Fredyson Lyngdoh (25) bad u Ïohborlang Lyngkhoi (32).
Ka Govt Boys HSS (West Garo Hills) ka la pynliem noh ïa ka Govt Boys HSS (South Garo Hills) da 2-1 kol. Ïa kine la thep da u Vivian Ch. Marak (15) bad u Wanchiang K. Marak (34), katba na ka liang ka Govt Boys na South Garo ka la pynphai kylla shi kol lyngba u Saint Zecharia D. Shira (36).
Ka Nongehram Adunai HSS (East Garo Hills) bad ka Nongjri Presbyterian SS (Ri-Bhoi) ryngkat ka Bakenang Upper Primary School (North Garo Hills) bad ka Little Star Eng. Med. SS (Eastern West Khasi Hills) ki la ïasam mar shi point hadien ba kim shym la lah ban thep kol haduh kaba kut ka jingïalehkai.
Haba phai sha ka kyrdan ïalehkai Under-17 ki kynthei kaba la long ha Madan Heh kaba ha Mawlai Phudmuri, ka Tyrsad HSS (East Khasi Hills) ka la khur ïa ka jingjop hadien ba ka la lah ban pynjem khnap haduh 7-0 kol ïa ka Dambok Aga U.P.S (South Garo Hills). Ka Larihun Songthiang ka la khur ïa ka hat-trick da kaba thep ha ka minit kaba 6, 37 & 60, ïa ki ar kol la thep da ka Ibashembha Khongsit (3 & 11), Medariïaka Kharkongor (15) bad ka Nishalin Nongrum (40).
Ka North Liberty HSS (West Jaiñtia Hills) ka la pynliem ïa ka Dalia SS (West Garo Hills) da 3-0 kol. Ïa kine la thep da u Peacefully Pohplet (10), Deigracia Dann (34) bad ka Eiladki Ksoo (51).
Ka Kynsai Govt. L.P & U.P School (West Khasi Hills) ka la pynliem noh ïa ka Nongehram Adunai HSS (East Garo Hills) lyngba ka shi kol ba la thep da ka Younisha Thabah (20).
Ka Christian HSS (Ri-Bhoi) ka la jop da 4-0 kol ia ka Jakrem Presbyterian HSS (South West Khasi Hills). Ka Daïamon Makroh ka la thep ar kol ha ka minit kaba 26 & 55, katba ïa ki shi kol la thep da ka Rilinda Ingti (43) bad ka Darika Rani (46).
Kane ka lympung kan bteng biang ha ka sngi Balang bad yn pynhap pyrda ïa ka ha ka sngi Saitjaiñ.
