Jowai, Naitung:
U MDC ka Liang Pyrshah na ka Trinamool Congresss u Bah Andrew A Shullai u la mih jyndat napoh ka dorbar halor ka jingbym don ka motion jong u ha ka thup jong ka dorbar lyuir kaba shisngi jong ka Jaiñtia Hills Autonomous District Council (JHADC) kaba la long ha ka Lah Sngi U Blei.
U Bah Andrew A Shullai u la ai ïa ka ‘motion’ halor ka jingdonkam ban pyntreikam ïa ka e-governance bad ka digitization ha JHADC bad u la dawa ïa ka jingpynshai na u Chairman ba balei ba ym shym la buh ïa kane ka mat ha ka dorbar.
U Chairman ka JHADC u Dr. Sankey Shangpung u la pyntip baroh ar tylli ki kam la pyntreikam da ka JHADC bad kumta u la kyntait ban pynrung ïa ka motion ban ïakren hapoh ka dorbar.
Shuh shuh u Bah Shullai u la kynthoh pyrshah ruh ïa u Chairman bad u la pyntip ba wat tang ka website jong ka JHADC ruh ym shym la update, hato ka dei kane kaba “phi pyntreikam ïa ka digitalization,”?? la kylli u Bah Andrew bad mih noh napoh ka ïingdorbar ban pyrshah ïa ka jingkyntait ïa ka motion jong u da u Chairman.
Hadien kane, ka la don ka kynta kylli jingkylli, bad ka ïingdorbar ka la kynmaw burom ruh ïa ar ngut ki MDC barim kiba la khlad noh, u Late Saron Ksoo bad u Late Philemon Lyngdoh.
U CEM ka JHADC Bah Thombor Shiwat u la wanrah ruh ïa ka kaiphod shlem treikam jong ka council.
