Shillong, Naitung 09
Wat la u la long kum u rangïalehkai phutbol ba u ju sngewtynnad ha ki por kiba u dang samla, pynban u la noh synñiang ha ka pule puthi da kaba seng ïa ki ar tylli ki shlem saiñ dur na ka bynta ka lawei jong ki khynnah ha ka pule puthi.
U (Late) Bah T.L. Parïong u la long u nongseng ba radbah ïa ka OM Roy Memorial Secondary School kaba ha Mawlai Kyntonmassar ha kaba ka la kynjoh mynta kumba 32 snem naduh ba la seng ïa ka ha u 1992, katba ïa ka O.B Roy Memorial Lower & Upper Primary la seng kham hashwa kata ha u snem 1973 ha Rangthong, kaba ha South West Khasi Hills.
U (L) Bah T. L. Parïong la kha ha ka 15 tarik u Risaw jong u snem 1945 ha ka shnong Nongnah Thangrai. U long uba ju sngewtynnad bha ban ïalehkai phutbol kum u rangïalehkai shadien (defender) ha ki por ba u dang samla ha kaba u la ïashim bynta ha shibun ki lympung ïalehkai phutbol khamtam ha ki thaiñ jong ka South West Khasi Hills.
Hadien ba u la pyndep ïa ka matric (Class-X) ha u snem 1965, ha une u juh u snem, u (L) T.L Parïong u la rung ha ka kam kum u nonghikai ha ka Rangthong Christian School. Dei ha kane ka shnong Rangthong ba u la ïakynduh bad ïathoh shongkurim bad ka Kong Aidalis Syiemlieh ha kaba u la shong la sah ha Rangthong lem bad ka longïing longsem.
Te kumta u (L) T.L. Parïong u la don san ngut ki khun, saw ngut ki khun shynrang bad iwei i khun kynthei kata ka Kong Astronomist Syiemlieh kaba long ka Principal jong ka skul OM Roy haduh mynta.
Ha ka jingïaid lynti jong u kum u nonghikai, utei u rangbah u la bat kum u Headmaster bad Secretary jong ka Rangthong Christian School ha ka snem 1966. Kum u briew uba ïeit bad shakri hok ïa ka kam ula leh shibun kiei kiei kiba bha ban wanrah jingmyntoi bad lyngba ka jingtrei shitom ka jong u.
U (L) T.L Parïong u la ïohpdiang ïa ki khusnam kum ka District Award (1981), State Award (1985) bad ïa ka National Award (1987).
Halor kine ki jingnoh synñiang jong u ha ka pule puthi, na ka liang ka O.M Roy Memorial Secondary School ha ka sngi Ba-ar ka la kynmaw burom ïa u nongseng ba radbah jong kane ka skul da kaba ka la plie ïa u motdur sah kynmaw ha phyllaw jong kane ka skul.
Ha kane ka sngi la ïadonlang u MLA ka Mawlai Constituency u Bah Brightstarwell Marbaniang kum u kongsan, kumjuh u MDC Bah Teiborlang Pathaw, ka Principal Kong Astronomist Syiemlieh, Bah A. Rymbai, ki nonghikai, ki khynnah skul bad ki nongshah khot sngewbha.
Lyngba kane ka jingïohi jngi jong u, shibun ki la mih bad paw na kine ki ar tylli ki skul. Nalor ka pule puthi, ka skul OM Roy ka la long ruh kaba paw ha ka kam ïalehkai phutbol ha kaba ka la lah ban rah ïa ka nam lahduh ha ka International Subroto Mukherjee Cup Football Tournament jong ka kyrdan ïalehkai Under-17 ki shynrang ha u snem 2013.
Kane ka sngi ka dei ruh artad ka lyngkhuh sngi khlad kaba lai jong utei u rangbah, ha kaba na ka liang ka Principal, kiba haïing hasem, ha ryngkat ki nonghikai bad ki khynnah skul ki la buh syntiew hakhmat utei u mot dur sah kynmaw.
