Mawkyrwat, Naitung 09
Da ka jingsngwkhia halor ka jingjot jingpra ki surok, ka jingtwa ki kynroh bad ka jingsynjor ki jingkieng dieng ha ki bynta bapher bapher jong ka thaiñ Ranikor namar ka jingïaid jong ki trok kit palat pud, ka Khasi Student’s Union (KSU) Ranikor Circle ha ka 9 tarik u Naitung 2024 ka la pynbna paidbah ba naduh ka 15 tarik u Naitung 2024 yn ym shah shuh ïa ki trok kit palat pud ba kin ïaid lyngba ka surok Ranikor-Umpung bad kumjuh ka surok Ranikor-Mawkyrwat lyngba ka shnong Nongnah.
U samla Marconi Thongni haba kren sha ki lad pathai khubor u la ong, hadien ba ka seng ka la leit ban jurip ka lap ba bun na ki surok ki la jot bad twa bad ki dang don haduh kumba 7 tylli eiei ki jingkieng dieng ha ka lynti na Ranikor ter ter shaduh Umpung bad namar ba ka dei ka por lyiur, ka surok bad ki jingkieng ki shongjem, kumta u la maham tyngeh ïa ki nongñiah trok kiba wan na Nongjri bad kiwei ki jaka ba ki dei ban kit tang hapoh ka 4 phut lane hapoh ka 12 ton kata naduh ka 15 tarik u Naitung.
Shuh shuh u la ong ruh ba kane ka jingïaid ki kali kit coke bad kiwei kiba kit mar khia kiba la kit palat pud khamtam ha ka por mynmiet ka la pynjot ïa ki surok, pyntwa ïa ki kynroh surok bad buh jingma ïa ki jingkieng ha kiba bun ki jaka, bad kumta ka seng kam banse ban shim ïa kane ka sien jam na ka bynta ka bha ka miat u paidbah.
U samla Marconi u la ong ruh ba ka hukum katkum ka kyndon 144 CrPC jong u Deputy Commissioner ka South West Khasi Hills District ban khang ïa ki trok kit palat pud ban ïaid lyngba kine ki jingkieng tlot ka shu don tang ha sla bad ka khlem trei kam haduh mynta.
Kumta ka seng ka la kyntu ruh ïa ki nongñiah trok ba ki dei ban ïatreilang bad ka seng namar ba kane ka long na ka bynta ka jingbit jingbiang u paidbah.
