Shillong, Naitung 09
U nongïalam ka liang pyrshah hapoh ka Khasi Hills Autonomous District Council (KHADC), u Bah Titostarwell Chyne u la ong ba ka liang pyrshah ka long kaba la khreh ban ïathir-ïatai bad ka liang synshar kaba la ïalam khmat da ka seng National People’s Party (NPP) halor kiba bun tylli ki mat ha ka dorbar lyiur jong ka Council ka ban sa sdang naduh ka 10 tarik u Naitung 2024.
Haba ïakren bad ki lad pathai khubor ha ka Sngi Ba-ar ha ka shlem treikam, na ka liang u Bah Chyne u la ong ba ka liang pyrshah kan dang ap ïa ka kaiphod jong ka Delimitation Committee halor ka jingpynbeit ryntih ïa ki shnong bad ka jingdon jong ki nongthep vote na ki MDC Constituency bapher-bapher na ka bynta ban wanrah hapoh ka ïingdorbar jong ka Council.
U la ong ba ka jingphiah ïa ki konstitwensi kam da mut eh ban phiah ha ka jingbun jong ki nongthep vote hynrei ka donkam ruh ban peit ïa ka jinglong ka jaka.
“Ngi kwah ba ka ilekshon ka dei ban long noh hynrei kata pat kam shong ha ngi, ka shong ha ka sorkar bad ka shong ruh ha ka Delimitation Committee”, la ong u Bah Titos.
Kum ban shu kdew hangne, ka Delimitation Committee na ka jingwad bniah jong ka, ka la hap ban pynjlan shwa ïa ka ilekshon da hynriew bnai bad ka la aiti ruh ïa ka kaiphod ha ka 8 tarik u bnai Naitung 2024 bad ïa kane ka kaiphod, ki Executive Committee yn sa wanrah hapoh ka ïingdorbar thawaiñ ka Council katkum ka Amendment Rules.
