Shillong, Naitung 09
Ka Khasi Student’s Union (KSU) EJHDU ka la pynpaw ïa ka jingpyrshah jur halor ka jingai jingbit ne No Objection Certificate (NOC) na ka bynta ban tei pynbha ïa ka jaka mane blei ki riewngeit Hindu ne ka Mandir ha ka jaka jong ka Sorkar.
Ka KSU hapoh ka jingïalam u samla Kwilnis Suchiang kum u Generel Secretary ka District Unit, ka la leit ban buh da ka dorkhas sha u Deputy Commissioner ban pyrshah jur ïa ka jingïoh NOC ïa katto-katne ki briew ban tei pynbha ïa la ka jong ka jaka mane Blei Mandir ha jaka sorkar.
Kane ka jaka ba la thmu ban tei ïa ka jaka mane blei ka don hapoh u pud u sam jong ka District Court, Khliehriat bad ha syndah jong ka shlem treikam Deputy Commissioner.
Ha ka kyrwoh ba la phah sha ki lad pathai khubor, ka seng ka la ïathuh ba ha ki snem ba la dep ka dei tang ka jaka mane blei ki nongtrei surok kaba tang shipor, hynrei hadien ba kine ki nongtrei surok ki la leit phai noh kane ka jaka mane blei ka la ïai bteng da ki katto-katne ki bar jylla kiba la tei beaiñ ïa ka jaka mane blei.
La pynpra noh ïa kane ka jaka mane blei ha ki snem ba la dep namar bym shym la ïoh jingbit na ki bor sorkar.
Ka seng ka la ïathuh ba haduh mynta ka dang don ka jingker sawdong da ki tin ïa ka jaka mane blei bad la ïoh jingtip ruh ba mynta ki bar jylla ki la ïoh jingbit kumba 500 sqft bad ki dang pan sa 250 sqft ban shna sa ïa ka jaka leit bar.
Kum ban shu pynkynmaw ba ïa kane ka jingtei jaka mane blei ha ki jaka sorkar, ka Sorkar Jylla ka la pynmih da ka Office Memorandum (OM) ha u snem 2010 katkum ka Special Leave Appeal (Civil) no 8516 of 2006 ba la rai da ka Supreme Court. Lyngba kane, ka Sorkar ka la thaw ïa ka kpait saiñ kam (policy) ba ïa ki jaka mane blei lah ban shim wai ha kaba yn hap ban siew shisien siew 25 percent katkum ka dor ïew jong ka khyndew lane 494 tyngka shi square feet kaba yn bthah bad ban pynbeit da ka tnat Revenue jong ka Sorkar Jylla.
Hynrei katkum ka Office Memorandum la thoh shai ruh ba ïa ka kpait saiñ kam kan treikam tang haduh u snem 2006 kaba mut ïa ki jingtei ba palat une u snem la dei lypa kiba la long beaiñ katkum ka para 5.
“Ka jingdon lypa ka jaka mane blei mynta da ki snem ka la pynkheiñ lypa ïa ka aiñ namar ka jingdon jong ka, ka dei ka bym ïoh jingbit bad kaba la pynkheiñ ïa ka Meghalaya Public Premises Unauthorised Occupation Act 1980,” la ong ka KSU.
Ka seng ka la ban jur ïa u Deputy Commissioner ba ïa ki jaka Sorkar hi ym dei ban ai jaka ban tei ïa kino kino ki kynhun niam halor ka nongrim ba ka lah ban wanrah ïa ka jingñiew shiliang bad ka jingbym sngewthuh jingmut.
Ka seng ka maham ba lada ïa kane ka jingtei ïa ka jaka mane blei ka ïaid shakhmat, ka seng kan sa khot ïa kiwei pat ki riewshimet ne ki kynhun ba kin pan noh ïa ki jaka kiba dei jong ka Sorkar bad ban tei ïa la ki jong ki ïing ne ki jaka mane jong ki hapoh East Jaiñtia Hills District.
Na ka liang jong u Deputy Commissioner u la mynjur ban pynsangeh shwa ïa kane ka jingthmu bad ban dang wad kham bniah halor kane ka kam na ka Sorkar.
Ka KSU ka la maham da lei-lei ym bit ban ai jingbit ban tei ïa ki jaka mane blei ha ki jaka Sorkar kiba dei ki ‘Public Premises’ bad ka seng kan ïai buddien ruh halor kane.
