Jowai, Naitung 09
Ka jingpynbeit thymmai ïa ki konstitwensi da ka Delimitation Committee jong ka Jaiñtia Hills Autonomous District Council (JHADC) ka la wanrah ka jingpyrshah kaba jur na kiba bun ki shnong jong ka West Jaiñtia Hills District.
Kane ka la paw ha ka jingkhot pynlong ïa ka public hearing ne ka jingpynsngew paidbah da ka Delimitation Committee jong ka JHADC ha ka 9 tarik Naitung kaba long ha District Library Auditorium, Jowai na ka bynta ki konstitwensi kiba hap hapoh ka West Jaiñtia Hills District.
Kiba bun ki shnong na ki konstitwensi hapoh West Jaiñtia Hills ki la pynpaw ba kane ka jingpynbeit thymmai ïa ki konstitwensi ka la pharia pynban ïa ki shnong ki thaw bad kam ïahap katkum ka jinglong-jingman ka jaka.
Kane ka juh ka jingpynsngew paidbah kan long ha ka Community Hall Khliehriat West ha Khliehriat na ka bynta ki 10 tylli ki Konstitwensi kiba hap hapoh ka East Jaiñtia Hills.
Namar kata, ka Delimitation Committee ka la kyntu ïa ki shnong ban phah ïa kino-kino jingai jingmut kiba ki paidbah ki kwah ban pynsngew ha kaba ïadei bad ka jingpynbeit thymmai ïa ki konstitwensi lyngba ka jingthoh bad ban pynpoi ruh ha ka 19 tarik Naitung hapoh 3.00 baje janmiet.
