Shillong, Naitung 09
U Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem u la pynbna ba shen yn sa plie noh ïa ka jaka sumar na ka bynta ban sumar Khasi ha Lum Sohpet Bneng bad ha kane ka jaka sumar yn sa ai ruh ka jinghikai sha kiwei pat kiba kwah ban ïoh ka lad ka kabu ban tip shuh-shuh halor ka rukom sumar khasi da ki dawai kynbat.
U CEM u la pynbna ïa kane ha ka jingïalang kaba la pynlong da ka KHADC ban sam biang ïa ki syrnod bad ki ID Card sa sha 36 ngut ki nongsumar kiba sumar Khasi bad kiba pynmih ïa ki dawai kynbat bad ïa kane ka jingïalang la pynlong ha Auditorium Hall jong ka KHADC.
La ïathuh ba ïa baroh kiba ïoh pdiang ïa kane ka syrnod bad ki ID Card kiba la wan na ka Khasi Traditional Medicine Commission (India) bad la ïada ïa ki hapoh ka aiñ jong ka Khasi Hills Autonomous District Protection & Promotion of Khasi Traditional Medicine Act, 2011.
Ha kane ka jingïalang la don lang u Bah Pynïaid Sing Syiem uba dei u CEM, u Bah Fantin Lakadong uba dei u EM ka Khajna, u Secretary barim ka Council, u Bah R. Wanñiang, ha ryngkat bad kiba ïoh pdiang ïa kane ka syrnod bad ID Card.
Haba ai jingkren ha katei ka jingïalang, u Bah Pynïaid Sing Syiem, u la ong ba lada ïan ujor ïa ka jylla Meghalaya bad ka jylla Assam, ki nongsumar da ki dawai kynbat hapoh ka jylla Assam ym pat shym la ithuh satia ïa ki da ka aiñ.
“Ngi sngewthuh ba ki Jaitbynriew jong ngi khamtam ba la ai sap da u Blei ha kane ka bynta, phi long ki nongïarap ïa ki para mynsiem”, la ong u Bah Pynïaid.
U la ong ba kiba bun ki jingpang jingshitom bad ki jingbym bit bym biang ha ka met jong u briew, kiba na ki jaka ai jingsumar sorkar ki la pynbna ba kim lah sumar shuh ïa ki hynrei haba ki leit phah sumar ha kitei ki nongsumar Khasi pat ki la ïoh ïa ka jingkoit jingkhiah.
“Ym shym la ithuh tang na ngi ka Council hynrei la ithuh da ka aiñ kaba khlaiñ bha ba la dep ban rai na ka liang ka District Council bad ba la mynjur da u Lat ka jylla ha u snem 2011”, la bynrap u Bah Pynïaid.
Shuh shuh u Bah Pynïaid u la ong ba dang shen, ka Council ka lah dep ban khot kumba 24 ngut ki nongsumar dawai kynbat Khasi ha kaba la dep ban ai sha ïa ki ïa ki syrnod jingithuh kum ki nongsumar kynbat tynrai.
U la ong ba na ka liang ka District Council ka lah dep ban shna ïa ka Khasi Traditional Medicine Institute ha Lum Sohpet Bneng ha kaba ka Council ka la pynlut kumba `.7 klur tam ha ka ban shna bad pynbit pynbiang ïa katei ka jaka ai jingsumar.
