Shillong, Naitung 09
U Gagan Narang, uba la ïashim bynta saw sien ha ka Olympic bad uba la khur ïa ka takma rnong (10m Air Rifle) ha ka Olympic Games 2012, u la shah jied ban mih bujli ha ka jaka ka MC Mary Kom kum u Chef-de-Mission jong ka kynhun ïalehkai ka ban leit ïashim bynta ha ka Paris Olympic 2024 ka ban sdang naduh 26 tarik mynta u bnai.
Ka President jong ka Indian Olympic Association ka Dr. P.T Usha hynne ka sngi ka la ong ba ka jingkyntiew ïa u Narang ba la 41 snem ka rta na ka kyrdan Deputy Chef-de-Mission ka la wan hadien ka jingweng noh ka Mary Kom. “Nga la khmih lynti ban ïoh ïa ki nongïalehkai kiba la khur takma ha ka Olympic na ka bynta ban ïalam ïa ka kynhun ïalehkai jong ngi bad nga la khmih lynti ban ïoh khnang ban mih bujli ha ka jaka ka Mary Kom,” ka la bynrap.
Ka Mary Kom, kaba la khur ïa ka takma rnong ha ka Olympics 2012, ka la pynbna ha u Ïaïong mynta u snem ban weng noh ïalade namar ki daw shimet.
Ka kyrdan Chef-de-Mission ka long kaba kongsan namar shisien ba la shah jied kin hap ban don ïa ka jingkitkhlieh ban long kum ki nonglam ktien na ka bynta ka kynhun ha ka Olympics. Kine ki kynthup naduh kiba bun ki jingïalang seminar bad ki nongïalehkai, ka jingpynïaid bad ka thong kaba kongsan eh jong ka kynhun hi baroh kawei.
Lada jia ba don ki jingïakajia ne jingïakynad kiba lah ban ym long kiba ju jia man ka por ha ki Olympic, ka dei ka kamram jong u Chef de Mission ban pynneh ïa ka jinglong ryntih bad ban ïarap ban pynbeit ïa ki jingeh. Ki don ruh ka bynta kaba kongsan ban pynbeit ïa kino kino ki jingeh ki bym pynneh ïa ki kyndon ha ka Olympics.
Na ka liang ka President ka IOA u la pynbna ruh ba ka khlur ïalehkai badminton jong ka ri, ka P. V. Sindhu, kaba la khur takma arsien ha ka Olympic, kan long kum ka nongrah lama na ka bynta ka kynhun ïalehkai ka India ryngkat bad u khlur ïalehkai Table Tennis, u A Sharath Kamal.
“Nga sngewkmen ruh ban pynbna ba tang kawei ka kynthei jong ka India kaba la ïoh ban khur ar tylli ki takma ha ka Olympic, ka P.V. Sindhu, kan long kum ka nongrah lama kynthei ha ryngkat u A. Sharath Kamal ha ka jingïalang plie.” Ka Dr. Usha ka la ong. “Nga ngeit skhem ba ki nongïalehkai jong ngi ki long kiba la pynkhreh bha ban wanrah ïa ka jingïalehkai kaba bha tam na ka bynta ka India ha ka Paris Olympic Games 2024.
Ka Paris Olympics 2024 kan sdang ha ka 26 tarik mynta u bnai bad kan kut ha ak 11 tarik u Nailar.Ka kynhun jong ka India ka don jingkyrmen ban wanrah ïa ka jingsarong da kaba khur bun tylli ki takma ha kane ka lympung bah eh jong ka pyrthei.
