Shillong, Naitung 09
Ka khyrdop Inner Line Permit (ILP) kaba la pynïeng da ka Khasi Students’ Union (KSU) harud surokbah NH-6 ha 20 Mer Paham-mawlein, ha ka step Sngi Ba-ar ka la shah pynpra bad shah thang ruh ïa ki jingpynïeng bad ki flex ba la wah.
Halor kane, ka KSU ka la kynnoh bad suba jur ba ïa kane ka jingpynpra ïa ka khyrdop ba la pynïeng da ka seng, la leh da ki pulit jong ka Ri-Bhoi.
Lah ban kdew hangne, ka KSU ha ka 6 tarik mynta u bnai, ka la hiar sha ka shnong 20 Mer ha Pahammawlein, ha kaba ka la pynïeng syndon da ka khyrdop la jong ban pyntreikam ïa ka ILP na ka bynta ban talasi ïa ki kot ki sla jong ki bar jylla kiba wan rung shapoh ka jylla.
Ka jingpynïeng hi jong ka KSU ïa la ka khyrdop ILP ka long halor ka jingkuman jong ka sorkar ban pyntreikam noh ïa ka ILP ha ka jylla bad ka jingdkoh ka sorkar jylla ban pyntreikam ïa ka Meghalaya Residents Security and Safety Act (MRSSA) ban tehlakam ïa ka rung ka mih jong ki mynder.
Tang ha kane ka sngi ba ka la pynïeng khyrdop, ka KSU ka la ïoh ban bat ïa bun ngut ki bar jylla kiba thmu wan rung shapoh ka Jylla khlem ki kot ki sla, bad ïa kine ki bar jylla la pynphai pat sha Assam.
Halor kane ka jingjia ki nongïalam ka KSU ki la suba jur ba ka jingpynpra bad jingwiang ding ïa kane ka khyrdop ka lah ban dei ka kam jong ki pulit.
Shuh shuh ka seng ka la pyntip ruh ba katkum ka jingïathuh jong ki paidbah, la kynnoh ba ki pulit ki la wanrah da ka puh shilum (JCB) ban rat bad pynpra ïa ka khyrdop ILP bad ynda la dep, sa thang noh ïa ki tum ki tam.
