Shillong, Naitung 09
U Myntri Rangbah ka Jylla, u Conrad K. Sangma ha ka Sngi Ba-ar u la thoh sha u Myntri Rangbah ka Assam, u Himanta Biswa Sarma (HBS) ban kyrpad phah tohkit halor ka jingkynnoh shah pynïap jong u nongshong shnong ka Meghalaya ha kawei ka ‘Rehab Centre’ kaba ha Assam.
“Nga thoh sha phi ban pynsngew halor ka jingjia kaba donkam ïa ka jingtohkit bad ka jingshimkhia kaba mardor,” la ong u Sangma ha ka jingthoh.
U la ong ba uwei u nongshong shnong ka Jylla (Meghalaya) ba la tip kyrteng kum u Niksamseng Ch. Marak, u la shah kem ha ki pulit ka Assam ha ka 2 tarik Naitung, 2024 bad la phah ïa u sha ka ‘Rehabilitation Centre’ ha Goalpara, Assam.
Hynrei, ar sngi hadien kane, la lap ba u la khlad noh ha katei ka ‘Rehab Centre’ – “New Life Foundation Centre, Nayapara, Goalpara”, halor ki jinglong-jingman kiba pynsuba ha kiba bun ki liang.
U Myntri Rangbah u la ong ba katkum ka jingïathuh ki bahaïing bahasem, ki nongpynïaid ka ‘Rehab Centre’ ha kaba sdang ki la kam ba utei uba ïap u la shim hi ïa ka jingim lajong, hynrei ki la kylla ktien hadien, ha kawei ka liang kaba la buh bad wanrah ka jingsngewkhia halor ka jinglong-jingman jong katei ka jingjia.
“La pyntip sha nga ba ka met ka don ïa ki dak mynsaw jur ba kynthup ïa ka dak shah dung tari ba jylliew ha ka bynta sha ka-diang jong ka durkhmat, dak shah thang, dak mynsaw jur ha ka tmoh, syngka bad kjat,” la ong u Sangma.
U la ong ruh ba katkum ki dak mynsaw haba shu peit ki kdew ba u Niksamseng u la shah pynshitom dusmon, shah shoh bad shah dung hapoh katei ka ‘Rehab Centre’.
“Kumta haba ïadei bad kitei kiei-kiei baroh, nga kyprad ïa phi ban phah tohkit, ïa kaba ki bahaïing ruh ki thrang ïa kane khnang ban pynïoh ïa ka hok,” u la ong.
Shuh shuh haba ïathuh ba ki bahaïing hasem ki la ujor ejahar haba ïa katei ka jingjia, u Sangma u la bynrap, “Ngan da sngewburom eh ïa ka jingtuklar jong phi ban tohkit halor kane ka jingjia.”
