Shillong, Naitung 09
U rangïalehkai barim u Gautam Gambhir u la shah thung kum u coach ka kynhun ïalehkai kriket ka ri, la pynthikna ka secretary ka BCCI u Jay Shah ha ka sngi Ba-ar.
U Gambhir un shimti ha ka jaka u Rahul Dravid, uba la lah ban pynurlong dangshen ban khur ïa ka nam lahduh ha ka T20 World Cup.
Utei u rangïalehkai barim un sdang ban pynïaid ïa kane ka kynhun kum u coach ha ka jingleit ïalehkai sha Sri Lanka ka ban sdang ha kaba kut jong u Naitung mynta u snem.
Kane ka jingpynbna u Shah ka long lyngba ka rynsan social media jong ka X. “Ka long ka jingkmen kaba khraw ban pdiang sngewbha ïa u GautamGambhir kum u coach uba thymmai jong ka kynhun ïalehkai kriket ka ri.”
“Hadien ba u la lah ban ïadon bynta bad ka kynhun ha ka kam ïalehkai jong u, nga kyrmen skhem ba u Gautam un long u briew uba biang na ka bynta ban kyntiew ia ka jingïalehkai kriket. U don ïa ka jingïohi jngai namar u la dei lypa u rangïalehkai kriket. Te kumta na ka liang ka BCCI kan ai jingkyrshan pura ha kane ka jingshimti ka jong u ïa kane ka kam kaba thymmai,” la bynrap u Shah.
Ha kane ka jingwan shimti u Gambhir, ka thong ka jong u ka long ban pynthikna na ka bynta ban pynlong ïa ka kynhun ïalehkai kriket ka ri ba kan nangkiew shaphrang ha ki lympung ïalehkai bapher bapher. U donkam ban iatrei lang bad ki rangïalehkai lem bad ki nongïarap jong ka kynhun khnang ban ithuh ha kano ka bynta kaba donkam ban pynkhlaiñ.
Te kumta ka jingkhmih lynti ka long kaba biang eh na ka bynta u Gambhir, khnang ban kyntiew ïa ka India ha ka kyrdan ba hakhlieh duh jong ka pyrthei. Te kumta lyngba ka jinglong mlien ka jong u ha ka kam ïalehkai bad ka jingsngewthuh ïa ka jingïalehkai, un lah ban pynbeit ïa baroh ki jingeh bad ban ïalam ïa ka kynhun sha ka thong jong ka jingjop ha ka lawei ka ban wan.
