Shillong, Naitung 09
Kum shi bynta ban pynmih pisa, ka Malki Sports Club kan pynlong ïa ka Penalty Shootout ha ka 12 bad 13 tarik mynta u bnai ha Madan Malki naduh ka por 10 baje mynstep.
Ka song pisa ha ka 12 tarik kan long T.10,000 na ka bynta ka lahduh bad T.5,000 na ka bynta kaba wan ba-ar. Ka bai rung ha ka 12 tarik ka long T.400. Ha ka 13 tarik ka song pisa na ka bynta ka lahduh ka long T.12,000, na ka bynta kaba wan ba-ar kan long T.5000 bad balai kan ïoh T.3000, ka bai rung ha katei ka sngi kan long T.500.
Ha kane ka penalty shootout yn shah tang ïa kiba don 3 ngut shaneng hapoh ka kynhun bad kiba duna ïa ka 3 ngut yn ym pdiang ha kane ka jingïakop. Na ka bynta ban ïashim bynta ki lah ban pynrung kyrteng ha katei ka sngi ha shwa ka por ba la buh.
Nalor ka Penalty Shootout yn pynbud sa ka Fete ka ban sdang naduh 3 baje janmiet bad ka Bumper jong ka Housie kan long T.50,000 ha ka 12 tarik bad T. 1,00,000 ha ka 13 tarik. Na ka liang ka Malki SC ka wer ïa ki kynhun sha kane ka lympung.
