Shillong, Naitung 10
Ka lympung ïalehkai State Level Subroto Mukherjee Cup Football Tournament 2024 ka la nangjam shaphrang ha ka sngi kaba ar kaba la long ha kane ka nongbah, ha kaba ka Nongjri Presbyterian SS na Ri-Bhoi ka la lah ban pynjem khnap ïa ka St. Claret HSS na South West Garo Hills haduh 11-0 kol.
Ha kane ka jingïakhun jong ka Under-15 (boys) kaba la long ha ka sngi Balang ha SSA Stadium, Polo ka Nongjri ka la lah ban ïalehkai bha naduh kaba sdang ha kaba u Banteilang Malieh u ïoh ban thep haduh san kol ha ka minit kaba (22,34, 36, 39 & 48), u Dabetskhem Rympei (7,12 & 40) u la khur ïa ka hat-trick. Ïa kiwei pat ki kol la thep da u Chanjip Chettri (20), Nongsan bha Warjri (32) bad u P. Ryndong (38).
Ka Khliehriat Presbyterian HSS (East Jaiñtia Hills) ka la shah rem noh ha ka Assam Rifles Public School (East Khasi Hills) da 1-6 kol. U Medonbanshan Kurkalang u la khur ïa ka hat-trick da kaba thep ha ka minit kaba marwei haduh saw kol (4,6,15 & 41), ïa kawei pat la thep da u Vamlalmal Sawdawing-kima (34). Kane ka kynhun ka la ïoh ei sa shi kol na ka daw ka jingbakla thep hi da u rangïalehkai ka liang pyrshah u Daraimi Lyngdoh (45). Na ka liang ka Khliehriat Presbyterian ka la pynphai kylla shi kol lyngba ka penalty ba la shut da u Everlasting Dkhar (23).
Ka Dominic English UPS (West Jaiñtia Hills) ka la pynliem noh ïa ka Little Star English Medium SS (Eastern West Khasi Hills) da 4-0 kol. Ïa kine la thep mar kol da u Serene Dkhar (6 & 14) bad u Aiborlang Wahlang (10 & 35).
Ka Govt HSS (South Garo Hills) ka la shah rem noh ha ka Little Star HSS (South West Khasi Hills) da 3-0 kol. Ïa kine la thep da u Alphaius Marshra (21), Mestarjoy Mawlong (30) bad kawei pat la ïarap pynthep da u rangïalehkai ka liang pyrshah u Sengkim R. Marak (42).
Ha ka Under-17 (Boys) kaba la long ha madan MFA, ka North Liberty HSS (West Jaiñtia Hills) ka la pynjem khnap ïa ka Mount Carmel Secondary School (South Garo Hills) haduh 7-0 kol. Ïa ki ar kol la thep da u Lovingstar Suting (31 & 69) bad u Jinial Rasmut (37 & 70), katba ïa ki shi kol la thep da u Chirak Surong (25), Daioshwa Siangshai (34) bad u Banteilangki Sumer (45).
Ka Myngken Christian HSS (Ri Bhoi) ka la pynliem noh ïa ka Tenset SS (South West Khasi Hills) lyngba ki ar kol ba la thep da u Banganson Nongphlang (35) bad u Banplibok Khongjoh (38).
Ka Montfort SS Dilni (West Garo Hills) ka la jop da 2-0 kol ïa ka Little Star English Medium SS (Eastern West Khasi Hills). Ïa kine la thep da u Adroit Dedo R. Marak (10) bad u Anrebath N. Sangma (33).
Ka Songsak Agitokgre HSS (East Garo Hills) ka la pynliem noh ïa ka Damram Union SS (North Garo Hills) da 2-1 kol. Kane ka la wan urlong lyngba ki ar kol ba la thep da u Bipuish Marak (4 & 67), hynrei na ka liang pyrshah ka la pynphai kylla shi kol lyngba u Sachin B. Marak (21).
Haba phai sha ka Under-17 (Girls) kaba la long ha madan Heh Mini Stadium, ka Lotus SS (East Jaintia Hills) ka la pynjem khnap ïa ka Dambok AGA. UPS (South Garo Hills) haduh 9-0 kol. Ka Diwakapaïa Dkhar ka la khur ïa ka hat-trick da kaba thep ha ka minit kaba 27, 35 & 44, ïa ki ar kol la thep da ka Alisha Lyngdoh (6 & 33), katba ïa ki shi kol la thep da ka Amethis Darnei (20), Daphisha Lyngdoh (30+1), Felinda Pajuh (39) bad ka Saphapaya Lyngdoh (56).
Ka Dalia SS (West Garo Hills) ka la pynliem noh ia ka Rongrong SS (North Garo Hills) lyngba ki ar kol ba la thep da ka Miksera Ch. Marak (36) bad ka Salniarani M. Sangma (40).
Ka Nongehram Adunai HSS (East Garo Hills) ka la jop da 3-1 kol ïa ka Okkapara SS (South West Garo Hills). Ïa kine la thep da ka Tochmi Momin (12), Soniranchi Sangma (23) bad ka Rongkmie Marak (41). Katba na ka liang ka Okkapara ka la thep shi kol lyngba ka Sildime D. Sangma (7).
