Nongpoh, Naitung 10
U District Magistrate (DM) ka Ri Bhoi ha ka kyrwoh kaba la pyllait ha ka Sngi Balang u la pyntip ba namar ka jinglong-jingman ha ka district kam long kaba shngaiñ, u la bthah ïa ki ophisar jong ki tnat shlem treikam sorkar bapher bapher ha ka district ba ki dei ban pynthikna ba ki nongap miet (night chowkidar) ki dei ban don ha ki shlem sorkar baroh ban ap pahara ban lait na kino-kino ki jingjia kiba thmu ban pynjot bad pynjulor ïa ki shlem treikam bad ki kali sorkar.
La bthah ruh ba manla ki shlem treikam ki dei ban don ïa ka tiar pynlip ding, ka um, u shyiap ban pynkhreh lypa na ka bynta kano-kano ka jingwan jia bad ba ïa ki kali sorkar ruh ym dei satia ban pynïeng ha ki jaka paidbah bad ha ki ïing shimet jong ki ophisar, hynrei dei ban pynïeng ha ki jaka kiba shngaiñ kum hajan jong ki thanat, ki outpost, beat house bad kiwei kiwei kiba la jied da ka shlem treikam jong u Superintendent of Police ka Ri Bhoi.
Ha kane ka hukum, la bthah ruh ïa kino-kino ki jingjia dei ban pyntip mardor sha u Superintendent of Police ka Ri Bhoi District ha kine ki phone number +91 8730940080/ +91 9856084514 (Police Control Room) bad u 112 (Helpline).
Kane ka hukum ka long kum shi bynta ban pyllait na ka jingshah pynjot shah pynjulor jong ki jingdon jingem ka sorkar ha kaba la bthah ruh ïa baroh ba ki dei ban bud ryntih thik bad kiba kheiñ sting bad khlem bud ïa kine ki hukum, kin ngat ha ki jingshah pynshitom.
