Shillong, Naitung 10
Ka Kynhun Myntri ka la ai jingmynjur ban don ka rukom pynïaid ryntih (SOP) ha kaba ïadei bad ka rukom thung kam ha ki tnat treikam ka Sorkar ha kaba yn thung kam lypa noh ha shwa ban don kiba shongthait.
La rai ba ki tnat treikam bapher bapher kin ai jingkheiñ lypa ha ki hynriew bnai mano ki ban shongthait noh bad ka jingthung kam kan dep ha ka por ba la buh bad ka jingpynbna ïa ka risol jong kiba shah thung kam.
Ki tnat treikam bapher-bapher kin pyntip lypa sha ka MPSC ne DSC khnang ba kin lah ban pynkhreh ïa ka jingthung kam.
Ka Kynhun Myntri ka la ai jingmynjur ruh ban pyntreikam ïa ka skhim ka ban ïarap ïa ki koidi kiba don ha patok kiba dei na ka longïing baduk bad kiba shem jingeh wat ban siew bai mukotduma bad ban ïoh jamin.
Kiwei pat ki rai kiba la mynjur da ka Kynhun Myntri ki long ka jingailad ïa ki trai petrol pump ban siew ïa ka VAT kaba dang sahteng, ka jingkyntiew ïa ka song pisa ha ka khusnam State Award na ka 1 lak sha ka 2 lak tyngka, nalor ka Meghalaya Public Communication Policy, 2024.
