Shillong, Naitung 10
Ka Khasi Hills Autonomous District Council (KHADC) ha ka Sngi Balang ka la pyntip ba ha ka jaka jong ka Outpost ba la thmu ban tei ha Langpih, la bujli bad tei noh da ka Community Hall ba la ai sha ka shnong Nonglang.
Ïa kane la pyntip da u Chief Executive Member (CEM) ka Khasi Hills Autonomous District Council (KHADC) Bah Pynïaid Sing Syiem haba jubab halor ka jingkylli ba la wanrah da u MDC ka Laban-Mawprem u Bah Mitchel Wankhar hapoh ka kynta kylli jingkylli ha ka sngi sdang ïa ka dorbar lyiur jong ka council.
Haba wanrah ka jingkylli, u Bah Mitchel u la kylli halor ka jinglong-jingman jong ka jingtei ïa ka outpost ha Langpih ba la mang pisa da ka KHADC.
U Bah Pynïaid haba jubab u la pyntip ba na ka liang ka Council ka la mang kyrpang ka pisa na ka bynta ban tei ïa ka outpost ha Langpih, kaba jaka ba bun ki jingïakynad bad halor kane, ka Council ka la sdang ban ïaid shakhmat ban ïakren bad ka tnat Kam Pohïing ka Sorkar namar ynda la tei mano pat ban pyntreikam namar ka Council kam don ïa la ki jong ka kynhun pahara.
“Ngim don satia ïa ka bor ban pyntreikam ïa ka Police Outpost khlem ka jingïatreilang bad ka tnat Kam Pohïing ka Sorkar Jylla namar kata, ngi la shim ïa ka rai ban aiti noh ïa ka jaka sha ka Dorbar Shnong Nonglang ba kan pyndonkam,” la pyntip u CEM bad bynrap ba ïa ka pisa ba la mang 30 lak tyngka ban shna police outpost la ïapynbeit bad u MDC ka Rambrai Jyrngam Bah Bajop Pyngrope ban shna noh ïa ka ïingdorbar ha Nonglang hadien ba ka executive committee ka la dep pynbeit bad ka sorkar jylla.
U Bah Pynïaid u la pyntip ba ka jinglut ban pyntrei ïa ka Community Hall hapoh ka shnong Nonglang, West Khasi Hills, ka long 30 lak tyngka bad ka kam mynta ka la ïaid shakhmat bad haduh mynta ka la dep kumba 40 haduh 50 persen.
Ha kawei pat ka liang, u CEM u la pynthikna ba ka District Council ka sngewkhia halor ka jinglong jingman hapoh ki thaiñ khappud, namar kata kala ïatreilang bad ka Sorkar Jylla ban buh noh da ka Police Outpost hapoh ka shnong Umwali.
U la ong ba kum ka Council ruh ka sngewkhia halor ki jingeh ha khappud bad kumta ban ïada ïa la ki jong ki briew, ka donkam ban don ka jingïatreilang naduh bad ki nongsynshar shnong, ki paidbah bad ki MDC bad ban pynkhlaiñ ïa kane, ka Council kam shim pisa wat tang shi tyngka ruh ban pynrung kyrteng ïa ka khyndew ha ki thaiñ khappud.
