Kyiv, Naitung:
U Myntri Kam Pohïing bathymmai jong ka UK ha ka Sngi U Blei u la kular ban pynpoi shuh shuh ia ki suloi, ki tiar siat bad ki namding sha ka Ukraine, da kaba kular ruh ba ka UK kan nang ai jingkyrshan shuh-shuh nangne shakhmat katba ka Ukraine ka dang shah thombor ha ka Russia.
U John Healey, uba la shah thung thymmai kum u Myntri kam poh-iing jong ka United Kingdom, u la leit ban jurip ia katei ka nongbah jong ka Ukraine kaba ki kad liengsuin jong ka Ukraine ki ju shah thombor da ki namding bad ki drone ki jong ka Russia bad la ong ba kane ka dei ka sien leit jngoh ba nyng-kong eh jong u naduh ba u la ioh bat ia katei ka shuki Myntri ka UK.
U Healey haba ai jingkren sha ki nong-ialam ka Ukraine ha katei ka sngi, u la ong ba ka Sorkar bad ki bor pynïaid hapoh ka ri ki lah ban don jingkylla, hynrei ka UK ka long shi mynsiem bad ka Ukraine bad u la kular ruh ba ka UK kan nym ieh noh da lei-lei ia ka Ukraine katba ka Russia ka dang leit ban thombor ia ka.
Kumta, ha kane ka sien leit jngoh ba nyng-kong eh jong u sha katei ka ri, u Healey u la kular ia ki jingiarap ba thymmai na ka liang ka Uk sha ka Ukraine ki ban kynthup naduh ki suloi ‘Artillery’, 250,000 tylli ki kuli, ki kali thma, ki lieng shipai kiba rit, ki ‘namding bad kiwei kiwei de ki tiar.
La ong ba ha katei ka sngi, u Healey u la ioh ban kynduh ia u President ka Ukraine- u Volodymyr Zelensky bad kumjuh ruh ia u Myntri kam pohiing- u Rustem Umerov hapoh Odesa.
Namar kumba la iohi naduh ba sdang jong ka thma hi, ka UK ka long kawei na ki nongkyrshan ba ratbah tam jong ka Ukraine naduh ba sdang jong ka jingleit hiar thma ka Russia sha Ukraine ha u Rymphang jong u snem 2022.
Ha katei ka sngi, U Zelensky, u la pyllait ïa ki dur kiba pyni ïa u Healey katba u dang buh ïa ki syntiew ha ka jaka kynmaw burom ïa ka sngi iap ki shipai duriaw jong ka Ukraine.
U Zelensky u la ong ruh ba u la ai ka jingtip kaba bniah ia u Healey bad ia u Myntri kam poh-iing jong ka Netherlands, u Ruben Brekelmans — uba la shimti ruh ia katei ka kam ha ka taiew ba la dep halor ka jinglong jingman jong ka Ukraine bad Russia ha madan thma.
Kumjuh ha kane ka taiew ba la leit, u myntri kam bar ri ka Netherlands- u Caspar Veldkamp, u la pynbna ba ka Netherlands kan sdang ban phah ia ki liengsuin iapom F-16 sha ka Ukraine khlem da pynslem shuh ha kine ki sngi ki ban wan.
Ha katei ka sngi, u Healey u la kular ruh ba ïa ki jingïarap ba kongsan ba ka UK ka la dep pynbna lyba ban pynpoi sha Ukraine, yn sa pynpoi lut noh sha ka Ukraine hapoh jong kine ki 100 sngi ki ban wan.
