Tel Aviv, Naitung:
U Myntri Rangbahduh ka Israel, u Benjamin Netanyahu ha kane ka sien u la ong ba kino-kino ki jingïateh kular ban sangeh thma ha Gaza ki dei ban ailad pat ruh ïa ka Israel ba kan sdang biang ïa ka jingïakhun ynda la dep kitei ki kam kiba shipor tad haduh ba kan da ioh ban pyn-urlong ïa ki jingthmu jong ka haba iadei bad katei ka thma hapoh Gaza Strip. Namar la iohi ruh ba ka jingïakren halor ka jingthmu jong ka U.S ban pynkut noh ïa kane ka thma kaba la neh hynniew bnai mynta, kan sdang biang.
San sngi hadien ba ka Hamas ka la pdiang ia kawei ka bynta ba kongsan jong katei ka jingthmu, arngut ki heh na kane ka kynhun lehnoh jong ka Palestine ki la ong ba katei ka kynhun ka dang ap ia ka jubab jong ka Israel halor ka jingtyrwa ba khatduh jong ka.
Kumta, la ong ba u Netanyahu u la pynbeit ban pynlong da ka jingïamir jingmut halor ki sienjam ban shim hadien lyngba jong lai tylli ki mat kiba la wanrah ha u Naitung da u President jong ka U.S. u Joe Biden.
Shuh shuh ruh la ong ba ia mynta hi ka kynhun lehnoh Hamas ka la weng noh shwa ia ka jingdawa kaba kongsan; kata ba ka Israel ka dei ban kular ia ka jingsangeh thma kaba pura shuwa ba kin iasoi ia katei ka soskular sangeh thma.
Hynrei u Netanyahu u la ban jur ba katei ka jingiateh kam dei ban khanglad ia ka Israel ban sdang biang ia ka jingiakhun jong ka pyrshah ia ki lehnoh Hamas tad haduh ba kan ioh ban pynurlong ia ki jingthmu haba iadei bad katei ka thma. Ia kita ki thong la batai ha kaba sdang jong ka thma kum ban pynpra ia ki bor shipai bad synshar jong ka Hamas, kumjuh ruh ban pynphai biang ia ki nongshah rahbor kiba la shah rahbor na Israel naduh kaba sdang.
U Director jong ka U.S. Central Intelligence Agency u William Burns un sa ïakynduh ïa u Myntri Rangbahduh jong ka Qatar bad ki heh jong ka tnat syntiat jong ka Israel bad Egypt ha ka Sngi Thohdieng ha Doha na ka bynta katei ka kam ban ia pynbeit halor ka jingsangeh thma kaba shipor hapoh Gaza. Kane ka long kum shi bynta ban ioh pynïaid ia ki kam ki jam kiba kongsan bad khamtam ban pynpoi biang ia ki jingiarap bad ka bam- ka dih sha ki paid nongshong shnong ka Gaza ha ka por kaba biang.
