Nongstoiñ, Naitung 10
Da ki phew ngut ki bar jylla kiba trei ha ki karkhana ha Riwiang, nangta ha Nongstoiñ bad Mairang ha ka 10 tarik mynta u bnai ki la hap ban leit phai noh sha la ki jaka hadien ba ka Khasi Students’ Union (KSU) West Khasi Hills ka la pynlong ïa ka jingkhynra.
Ka khubor na ki nongïalam ka KSU, la ïathuh ba katei ka jingphah leit phai ka seng ïa kitei ki bar jylla ka dei namar ka jingpynkheiñ ïa ka Inter-state migrant workmen act.
Nalor kane la ïathuh ruh ba ha kane ka jingkhynra ka KSU, kumba 50 ngut ki bar jylla ba trei ha ki ar tylli ki karkhana ha Riwiang bad ha ki bynta jong ka Nongstoiñ bad Mairang ki la hap ban leit phai ïing.
Ki la ong ruh ba ha ka jingkhynra, ka seng ka la lap shibun ka jingpynkheiñ aiñ wat tang ïa ka Work Permit, Labour license, EPIC ban pynshisha ba ki dei ki nong India ruh kim do. Kumta na ka liang ka seng ka la beh krad ïa ki sha ka jaka ba ki wan bad la maham ruh ïa ki trai ba wanrah ïa ki lada jia kano-kano ki hap ban shim ïa ka jingkitkhlieh.
Ka kyrwoh khubor na ka KSU ka la ong ba ka seng kan ïai bteng ban khynra ha kiba bun ki bynta jong ka district ha ki sngi ban wan.
Shuh shuh la ong ruh ba kane ka jingkhynra jong ka KSU ka dei shi bynta ban pynsngew sha ka sorkar halor ka jingdawa ïa ka ILP ha baroh kawei ka Ri Khasi. Ha kane ka jingkhynra hapoh Nongstoiñ la lamkhmat da u samla Comingstar Khardewsaw, General Secretary ka KSU Nongstoiñ Circle ha ka jingsynrang lang u samla Blastarlan Kharbani, Office Secretary ka KSU West Khasi Hills District Unit.
