Jowai, Naitung 10
U Dolloi ka Elaka Jowai Bah Puramon Kynjing ha ka 10 tarik Naitung u la pyllait paidbah ïa ka kot kaba la thoh ha ka ktien Assamese kaba la jer kyrteng ‘Jaiñtia Pahar ne Rilum Jaiñtia’ ba la thoh da u Bhaskar Kiran Bora.
Ïa kane ka kot la thoh katkum ka jingshem jong u Bhaskar Kiran Bora ha ki 20 snem mynshwa ba u la wan jngoh ïa ka Jaiñtia Hills bad u la thoh shaphang ka jaitbynriew Pnar, ka kolshor, ka Niamtre, ki khanatang bad kiwei kiwei.
Shuwa ban pyllait ïa ka kot la pynlong ïa ka jingïalang kaba lyngkot ha ïing treikam jong u Dolloi, ha kaba u Bhaskar u la pyntip ba u la ïap-biej ïa ka kolshor jong ka jaitbynriew Pnar ha ki 20 snem mynshwa haba u ïashim bynta ha ka Behdeiñkhlam kaba ju long manla u snem bad naduh kata ka por u la bteng ban wan jngoh ïa ka Jaiñtia bunsien ban tip kham bniah shaphang ki briew bad ka kolshor ka jong ki.
U Bhaskar u la pyntip ruh ba ka kurim jong u, ka Priyam Bora ka la ai mynsiem ïa u ban thoh ïa ka kot bad u thmu ruh ban pynkylla ïa kane ka juh ka kot sha ka ktien phareng.
U Bah Puramon Kynjing u la ai khublei ïa u Kiran halor ka jingjop jong u, u kyrmen ba ki briew na Assam bad ki briew kiba pule ïa ki kot Assamese kin kham tip shuh shuh ïa ka kolshor jong ki Pnar bad ïa ka khanatang ka jong ki.
