Shillong, Naitung 10
U Myntri Rangbah ka Jylla, u Conrad K Sangma u la ong ba ym don mano-mano ba lah ban khynra ïa ki nongtrei bylla namar ka tnat Labour ka don ban peit ïa kane ha kaba u la pynshai ruh ba kam long kaba dei ban kynnoh ba ka Sorkar Jylla ka khlem pyntreikam ïa ka ILP namarba ka Sorkar Pdeng kam pat pyntreikam ïa kane haduh mynta.
Ha kajuh ka por, u Myntri Rangbah u la ong ba ka don ka aiñ ha kane ka Jylla na ka bynta ki nongtrei bylla kiba wan nabar Jylla ha kaba ki kontraktor ki hap ban pynrung kyrteng bad kane ka aiñ ka dei ka Meghalaya Identification, Registration (Safe-ty and Security) of Mi-grant Workers, Act.
“Ym don mano-mano ba lah ban leit khynra wat la ki don ki kynhun kiba leh kumta. Ka Jylla ka don ïa ka tnat Labour kaba lah ban leh ïa kane,” la ong u Myntri Rangbah. U la ong ba saw tylli ki ejahar la mudui ha kaba ïadei bad kine ki jingkhynra.
Ka don ka jingkynnoh ba ki don ruh ki nongtrei bylla ki la shah shoh ha ka por ba leit khynra work permit ki dkhot ka KSU ha ka jaka ba pyntrei ïa ka JN Stadium, ha kaba la don ruh ki briew kiba shah ktah kti kiba la wan khnang na ka bynta ban pynbit pynbiang ïa ka madan namar ka nongbah Shillong kan pynlong ïa ka jingïalehkai phutbol kaba paw bha, ka Durand Cup.
Halor ka jingkynthoh ka KSU ba khlem pyntreikam ïa ka ILP, u Myntri Rangbah u la ong ba ïa ka ILP ka Sorkar Pdeng kam pat ai ban pyntreikam, namarkata kam ïahap ban mih ka jingkylli ba ka Sorkar Jylla kam pyntreikam ïa ka ILP.
Halor ka MRSSA, u la ong ba ka Sorkar Jylla ka la wanrah ka jingpynkylla ban pyntreikam ïa kane ka aiñ hynrei u Lat um ai jingmynjur bad u phah sha ka Ministry of Home Affairs (MHA) ban khmih bniah hashwa ban mynjur. Kumta u la ong ba ka MHA ka la pynphai biang sha ka Sorkar Jylla bad ka Sorkar kan dang khmih biang ïa kane.
Haba kylli shaphang ka jingpynrung kyrteng ïa ki nongtrei bylla kiba wan ïalam nabar Jylla khamtam ka jingkitkhlieh lang ki kontraktor kiba pyntrei ïa ki projek, u Myntri Rangbah u la ong ba katkum ka aiñ, ki kontraktor ki hap ban pynrung kyrteng ïa ki nongtrei bylla, bad lada don kim bud ïa ka aiñ ban pynrung kyrteng ïa ki nongtrei bylla kiba ki wanrah, dei ban ujor ne pyntip sha ka Sorkar khnang ban leh ei ei katkum ka aiñ, hynrei ban leit khynra hi bad shim ïa ka aiñ ha kti, kam dei satia ka lynti bad kam shah katkum ka aiñ.
