Shillong, Naitung 10
Ki pulit ka East Jaiñtia Hills ha ka Sngi Balang ki la pyntip ba ha ka 4 tarik Naitung, 2024, la lap ïa ka metïap jong uwei u briew napoh kawei ka Container trok ka bym shym la pyndonkam shuh.
Ha u kyrwoh khubor, u SP ka East Jaiñtia Hills u la ong ba ha ka 4 tarik Naitung la ïoh jingtip halor ka jingdon jong kawei ka metïap hapoh ka Container Truck ka bym shym la pyndonkam shuh, bad ïa kane ka trok la buh ha ka Joply Compound ha Lad Rymbai Datsympeiñ.
Na ka liang ki pulit ki la shimti noh ïa katei ka metïap bad la rah sha Khliehriat Civil Hospital ban leh ïa ka post – mortem bad hadien kata la buh sha ka kamra buh metïap.
Haduh mynta, ki pulit kim pat lah ban ithuh ïa ka kyrteng jong utei u briew uba la khlad. La ong ba utei uba la khlad u don ïa ka snieh doh kaba lieh, ka rynïeng kaba 5 phut 4 inshi, bad u la phong da ka track suit jacket rong byrthup bad ka patlun jrong rong jyrngam.
