Shillong, Naitung 10
Ka jingïakhun pyrshah jong ka Hynñiewtrep Youth’s Council (HYC) ban pynduh jait bad rat dyngkhong ïa ka jingjyllei u drok ha kylleng ka sor Shillong ka dang ïai bteng haduh kine ki sngi ha kaba ka leit ban kynra ha ki bynta bad ki jaka ba jyllei kiba die bad kiba pyndonkam ban dih ïa u drok.
Ha ka miet jong ka 10 tarik u Naitung, ka seng ka la leit ban khynra biang sa shisien pat ha ka thaiñ Motphran ïa ki nongdie bad ki nongdih drok.
Wat la na ka liang ka seng, ka la ju pynlong ka jingkhynra drok na ka por sha ka por ha ki thaiñ ka Motphran, Ïewduh, Khlieh Ïew bad kumta ter-ter namar ba ha kine ki thaiñ, ka jingjyllei ki nongdie bad nongdih drok ka la long kaba shyrkhei haduh katta-katta. Ha kane ka jingleit khynra jong ka seng, ka seng ka la ïoh ban bat haduh kumba 7 ngut ki khynnah nongdie bad nongdih drok ha kaba 5 ngut na kine ki dei ki Khasi bad 2 ngut pat ki dei ki bar jylla.
Ha kane ka jingkhynra ka seng ka la ïoh ban kurup shibun tylli ki thyrnia injek drok ha ryngkat u drok na ka met jong kine ki khynnah bad ka la thang noh shisyndon ïa u drok bad ki thyrnia injek drok kiba la ïoh ban kurup na ka met kitei ki khynnah.
