Shillong, Naitung 10
U rangïalehkai ba dang 16 snem ka rta u Lamine Yamal u la long uba dang khynnah eh napdeng ki rangïalehkai ha ka lympung ïalehkai European Championship 2024 namar u la ïoh ban thep kol na ka bynta ban pynlong ïa ka Spain ban pynliem noh ïa ka France da 2-1 kol bad ban jam sha ka final.
Kane ka nam jop ka la wan urlong lyngba u Dani Olmo uba la thep ïa ka kol ba ar pyrshah ïa ka France bad mynta u la don jingkyrmen ban khur ïa ka khusnam golden boot ha kaba u la lah ban thep haduh saw kol ha kane ka lympung.
Tang mar iasdang kane ka jingïakhun, ka France ka la ïoh ban pynkhih jar nyngkong eh ha ka minit kaba 8 lyngba u Randal Kolo Muani bad ïa kane la ïarap pynbuh da u Kylian Mbappe. Hynrei hadien katto katne por u Yamal, u ban sa kynjoh sha ka rta kaba 17 snem hashwa ka jingïakhun final, u la lah ban pynïakhaid kylla ha ka minit kaba 21.
Hadien saw minit, u Dani Olmo u la ïoh ban thep kol na ka bynta abn pynlong ïa ka Spain ban tam da 2-1 kol.
U Yamal, uba al noh synñiang ban ïarap pynbuh bol lai sien ha kane ka lympung, u la pynpaw ïa ka jingsngew sarong halor ka jinglah ban ïalehkai bha ka jong u ha kane ka lympung. “Nga sngewkmen ïa lade bad nga sngewrong ba ngi la lah ban jam sha ka final,” la ong u Yamal.
Ka Spain, kaba la bat lai sien ïa ka nam lahduh, ka la don jingkyrmen ban rah biang ïa ka nam lahduh ha ka sien kaba saw ha Europe, namar kane ka kynhun ka la long kaba nyngkong eh ban khur jingjop ha baroh hynriew sien ïakhun ha kane ka lympung ïalehkai jong ka Euro.
“Te kumta ngi dang sah sa shi kyrdan na ka bynta ban rah ïa ka nam lahduh,” la ong u Olmo.
“Ngi la nangjan ban kynjoh sha ka thong. Kane ka kynhun ka long kaba phylla bad ngi dei hok ban khur ïa ka jingjop.”
Kumba ka paw ha kane ka jingïakhun semi final kaba nyngkong, ka Spain ka la lah ban ïalehkai bha naduh kaba sdang ha kaba kam shym la ailad ïa ka liang pyrshah ban shah thep kol. Watla ka France ka la ïoh ban pynkhihjar nyngkong, hynrei hadien ka la shem jingeh ban pynphai kylla. Watla u Mbappe u la shem jingeh ban pynpra ïa ka jingkhlaiñ ki rangïalehkai ‘dien ka Spain.
Na ka liang u coach ka France u Didier Deschamps u la ai jingïaroh ïa ka jingkhlaiñ bor ki rangïalehkai ka Spain. “Ki la lah ban ïalehkai bha ban ïa ngi bad kim shym la ailad ban shah thep kol haduh kaba kut.”
