Shillong, Naitung 10
Kan dei ka sien nyngkong eh ba ki khynnah ïalehkai kin shah dawa pisa kylla ha la ka jong ka synjuk ïalehkai hadien ba ki la ïoh ïa ka baibam (scholarship) na ka tnat ïalehkai jong ka Sorkar Jylla lyngba ka jinglah ka jong ki ban pynpaw ïa ka jingtbit ha ki kam ïalehkai da kaba khur takma ha ki lympung ïalehkai bapher bapher.
Kane ka la wan jia ha ki khynnah ïalehkai karate kiba don hapoh ka synjuk jong ka Meghalaya State Karate Do Federation (MSKDF) bad kumjuh kiba ju ïalehkai ha ka Kickboxing ha kaba ki la hap ban leit ujor syndon sha ka shlem treikam jong ka tnat ïalehkai jong ka Sorkar Jylla lem bad ka Meghalaya State Olympic Association (MSOA) pyrshah ïa u Bah Donny Raphael Ranee uba long u nongïalam jong kane synjuk ïalehkai kaba dang shu paw pyrthei thymmai.
Haba pynpaw ha ki lad pathai khubor ha ka Sngi Balang ha Shillong Press Club, ki kmie jong ki khynnah ïalehkai kiba kynthup ïa ka Kong Jesica Blah, Kong Sylvia Dkhar, Kong K. Nongkhlaw bad Kong B. Kharbithai, ki la pynpaw ïa ka jingsngewdiaw mynsiem ba katei ka synjuk ïalehkai jong ka MSKDF ka la dawa pisa (percentage) kylla na ki khynnah. “U Bah Donny u la leh shisha ïa ki kam kiba la ktah bha ïa ngi ki kmie jong ki khynnah.”
“U Bah Donny u la dawa ruh ba kin hap ba kin ai 10% na ka 100 jong ka khusnam pisa (Cash Award) bad sa T. 500 tyngka na ka scholarship kaba ki khynnah ki ju ïoh na ka Sorkar Jylla lyngba ka tnat ïalehkai,” ki la bynrap da kaba ong ba lada jia ba ki khynnah ne ki kmie ki kpa kim ai, ki lah ban shah beh noh na ki shlem ba ai jinghikai ka jong u Bah Donny.
Kawei ka kmie jong iwei i khynnah kam lah khlem da jaw ummat, namar ba ka la sngew pangnud palat ïa kaei kaba la jia ïa la ka jong ka khun. La kynnoh ba kane ka synjuk kam shym la don ïa ki coach kiba la pass ne shah pyntbit pura ban lah pat ban ai jinghikai ïa ki khynnah.
La ong ba katei shlem ai jinghikai ka MSKDF ha u Jymmang mynta u snem ka la ïalam ïa ki khynnah ban leit sha Dehraduh na ka bynta ka All India KIO Natiuonal Karate Championship, hynrei ki la kynnoh ha kane ka lympung ym shym la don satia ka kyrdan ïakhun jong ka Sub-Junior.
Lah ban pynkynmaw ba ha u snem ba la lah ka MSKDF ka la kam ba ka la ïoh ka jingithuh na Indian Olympic Association (IOA) bad ka la dawa ban ïoh ka jingithuh sa na ka MSOA, hynrei na ka liang ka MSOA ka la kren shai ba kan ithuh beit tang ïa ka All Meghalaya Karate Do Association (AMKA) kaba la slem bad kaba la sei ïa bun bah ki nongïalehkai kiba kynsai kiba la paw ha ka ri India bad ha kylleng ka pyrthei.
