Mawkyrwat, Naitung 10
Ka Lamlynti Border Farm Society ba la lamkhmat da u samla Embhah Rymbai na Phlangmawsyrpat, East Khasi Hills kaba hap hapoh Mawsynram Block bad kaba long kawei na ki society kaba la pynmih ïa ki tiar pyndonkam ha ki jingkhawai bad kiwei kiwei ban shna ïa ki pliang ja bad ki bul lyngba ki sdor kwai, kiba shait khot ka Dob Wai.
Hynrei kaba sngewsih ka long ba ka sorkar kaba shait pynshlur ïa ki khun samla ban seng kam lajong bad ban ïeng ha la ki jong ki kjat ka la ieh khunswet ïa kane ka society bad kam shym la phai khmat lem ban ïarap eiei.
U samla Embhah Rymbai, President ka Society u la pynpaw ïa ka jingsngewdiaw haba ïadei bad kane ka kam namar na ka liang ka society ka la ju pyrshang ban ïakynduh ïa kiba heh bad ïa ka Khadi Board Industries hynrei haduh mynta kam pat don kano-kano ka lad jingïarap ba ki la ïoh. Kumta kane ka la pynnoh mynsiem shi katdei eh ïa ka society namar ka jingbym don lem ki nongkyrshan ne ai mynsiem lem.
U la ïathuh ruh kumba long mynta wat la kine ki pliang ki long kiba itynnad bad ki bym pynjaboh ïa ka mariang ha kaba kiwei ki jaka ki ïaid dor bha hynrei ka jingdawa ki briew ka duna bha namar ka daw ka long ba kane ka society ka don tang kawei ka mashin ban shna ïa ki pliang katba ïa kiwei pat ki mashin ban shna kum ïa ki bul bad shamoit kaba ki briew ki kwah kim don.
Nalor kine, u la ïathuh ruh ba ka bording ilektrik kam biang bad ki jaka ban buh ïa kine ki tiar ruh kim biang.
Ha kaba ïadei bad kane, ka FKJGP South East Khasi Border Circle hapoh ka jingïalam u samla Kyrmen Shangdiar, President ka la ïoh lad ban leit jngoh kum shi bynta ban ai mynsiem ïa ka Lamlynti Border Farm Society.
Ka seng ka la ïoh ban ai ruh da ka mementos bad noh synñiang khyndiat eh kum ka dak ka jingai mynsiem bad nang pynshlur ïa ka society ba kan nang ïaid shakhmat ha kane ka kam bad nang trei shitom wat ha kaba kam pat ju don kano kano ka lad jingkyrshan lyngba ki bor sorkar. Namar kata, na ka liang ka seng ka la kyrpad ïa ki bor ba dei khmih bad kiwei kiwei ki tnat ba kin ai lem ka jingkyrshan ïa kane ka society lyngba ki skhim ban kyrshan ïa ka kam jong ki namar kane ka long kawei na ki lad ai kam ai jam bad ban kyntiew ïa la ki jong ki briew ha ka dong bad ha jylla baroh kawei.
Ka seng ka kyntu ïa ki para dong para thaiñ bad kiwei kiwei ruh ban ïasnoh kti lang ban shim ‘order’ khnang ba kan long ka lad ban kyrshan ïa kane ka society.
