Beirut, Naitung:
Ki lehnoh Hezbollah jong ka Lebanon ha ka Sngi U Blei ki la pyntip ba ki la leit ban ther bom sha ki thaiñ lum ba don ki shlem treikam jong ki shipai khappud ka Israel ha Golan Heights.
La ong ba katei ka jingjia ha katei ka sngi, ka long kaba kham jur napdeng ki jingiakynad hapdeng katei ka kynhun lehnoh bad ka Israel ha kine ki bnai ba la leit.
Ka Hezbollah, kaba la ioh jingkyrshan na ka Iran, ka long ruh ka paralok ba iajan eh bad ka kynhun lehnoh Hamas kaba synshar hi ia ka nongbah Gaza mynta da ki phew snem bad la ong ruh ba ka Hezbollah naduh ba sdang jong ka thma ka Israel bad ki Hamas hapoh Gaza, ka la sdang ban pyni bor bad ban ktah kti ia ka Israel da ki jingiakynad ha khappud namar katei ka kynhun lehnoh ka la dawa ia ka Israel ba ka dei ban sangeh noh ia ka jingleit hiar thma sha Gaza lada ka kwah ban lait na ki jingma.
Ha ka Sngi Nyngkong, ka Hezbollah ka la pynbna ba ki briew jongka ki la ioh ban ther bom sha ki bynta jong u Lum Mount Hermon, kum ka khubor jong ka jingmaham na ka Hezbollah sha ka Israel namar ka jingpyni bor jong ka Israel ha kine ki khyndiat por ba la leit.
Kumjuh ruh na ka liang jong ka tnat shipai ka Israel, ka la pyntip ba kawei ka drone kaba wan poi na Lebanon ka la leit hap bad bthei ha ki bynta jong u Lum Moutn Hermon hynrei ka long kaba donbok ba ha katei ka jaka ym shym la don briew ne don iing bad kumta kim shym la don kiba ngat ne mynsaw ha katei ka jingjia.
