Shillong, Naitung 10
Ïeng ha la ki jong ki kjat ban kamai ïa ka hok!
Kine ki kyntien ki dei ki nuksa kiba i Kong Lucy Lamare i la pyni ba ngin bud wat la hapdeng kiba bun ki jingtynjuh bad ki jingïaleh ha ka jingim hynrei haba ka mon ka don, ka lad ka plie ban trei shitom.
I Kong Lucy Lamare i dei i briew ba duna ha ka bor ïohi naduh ka por ba i dang dap 2 snem ka rta. I shong i sah bad ka Blindly Trust Organisation kaba don ha Lumbasuk-A Lawjynriew ha Nongthymmai kaba dei ka jaka kaba rit bad kaba peit ïa ki briew kiba don jingduna ha ki dkhot met khamtam ïa ki briew ki bym don ka pule ka puthi bad kiba kut ka lad ka lynti. Ha kane ka jaka sah ki ju ai jinghikai ruh ban ïeng ha la ki jong ki kjat bad kumno ban kren bad khana.
Kaei kaba ngi ïoh mynsiem bad kaba ktah ïa ngi ka long ba i Kong Lucy da ka mynsiem ban trei shitom i la mih na la ka jaka sah na Nongthymmai Lawjynriew naduh ka por 9 baje mynstep ban leit shong die ‘waidong ha Laitumkhrah ha ka lynti ban leit sha Nazareth Hospital.
“Nga buh ka jingkyrmen ïalade ba ong ba haba ngi ïaid kai ne leit kai ngi nang hynrei ba ngin trei ïa ka kam, balei ngim nang? Ngi dei ban nang haba U Blei U la ai ïa ngi ka jingmut-jingpyrkhat bad lada ngi duh ki khmat hynrei ngi don ïa ki kjat ki kti, te ngi dei ban nang ban kamai”, la ong i Kong Lucy. I Kong Lucy i la ïathuh ba naduh ka por ba la kha ïa i, i la duh noh ïa la ki kmie ki kpa bad la pynheh pynsan ïa i da i mei-ieid.
I la ïathuh ba ha ka por ba i dang dap 2 snem ka rta, ki khmat jong i ki la saw bad kumta na ka liang ki bahaïing bahasem jong i, ki la sumar ïa kane ka jingpang da ki dawai kynbat kaba la pynlong ba in duh noh shisyndon ïa ka bor ïohi. I Kong Lucy i la ïathuh ba ka dei naduh u bnai Nailur 2023 i la sdang ban die kwai da kaba ïaid da ka kjat naduh Nongthymmai ter-ter. Dei tad ha u bnai Kyllalyngkot 2024 ba i la ïoh ban shong die kwai habar jong kawei ka dukan kaba don hajan ka Nazareth Hospital.
I Kong Lucy i la ïathuh ba i ju siew T. 1,000 manla u bnai na ka bynta ka bai shong bai sah hapoh ka Blindly Trust Organisation. I la ïathuh ba ïa u kwai bad u tympew i ju leit ban thied hi dalade na Ïew hynrei mynta pat i la shu phah buh noh ha kawei ka dukan kaba don ha Nongthymmai da kaba kyrpad ruh ïa ki paidbah ba kin thied kwai na i khnang ba kan long ka lad jingïarap ïa i.
I Kong Lucy i la ïathuh ba U Blei um ju iehnoh ïa i ha ki kam ba i trei bad kumta ka la pynlong ïa i ba in leit die kwai ha katei ka jaka ban pynbit pynbiang ïalade ban lait ha ka ban shaniah ha kiwei
“Kam dei kaba suk ïa nga ba ngan shaniah ha kiwei namar kiwei ruh ki trei na ka bynta ka ïing-ka sem ban pynbit pynbiang hynrei ba ngan shu pan beit kumto kam dei kaba suk, kumta nga la pyrshang da ka umsyep katba nga lah ba ngan die da une u kwai”, la ong i Kong Lucy.
Shuh shuh i Kong Lucy i la ai khublei ïa baroh ki paidbah kiba ju ïarap bad batai lynti ïa i ha lynti ha syngkien bad kumjuh ruh ïa kito kiba don bynta ban ïarap ïa i ha kiba bun ki liang. Lyngba ka jingïaid lynti jong i ïa ki jingeh ha ka jingim, i la ai mynsiem ïa ki paidbah ba haba ki don hapdeng kino-kino ki jingeh, kim dei ban duh jingkyrmen hynrei ki dei ban ïai trei ïa ka kam kaba ki don la ka long kaba rit ne kaba heh namar kane ka dei ka jingai sngewbha jong u Blei lada ki leh ïa kaba bha bad ba kim dei ban leh jaituh bad ban ibang ïa ka jong kiwei hynrei ki dei ban ïeng ha la ki kjat lajong.
“Ha kano-kano ka jingeh kaba phi don, wat buh ïa ka jingduh jingkyrmen hynrei to trei ïa ka kam la ka long ka kam kaba rit ne kaba heh namar ka dei ka jingai sngewbha jong u Blei lada ki leh ïa kaba bha, kan long ka jingkyrkhu. Wat long kiba jaituh bad kiba jaipdeh bad wat ju ibang ïa ka jong kiwei hynrei to pyrkhat ïalade ban trei da ka umsyep lajong khnang ba kan kyntiew ym tang ïalade shimet hynrei ïa ka imlang-sahlang baroh kawei”, la ong i Kong Lucy.
