Shillong, Naitung 11
Ki nongïalam jong ki synjuk ïalehkai Martial Arts ki la pynshai ba ka jingkynnoh ki kmie jong ki khynnah ïalehkai kam long kaba shisha. Ki la kam ba ka jingpan pisa na ki khynnah ka long na ka bynta baroh ki jingdonkam jong ki haba ki leit ïashim bynta shabar Jylla namar kim shym la ïoh jingïarap eiei na ka Sorkar Jylla.
Kine ki nongïalam ki kynthup ïa ka Kong Bajopkin Kharmudai, Secretary ka Jeet Kune Do Association, ka Lorenza Songthiang, Secretary ka East Khasi Hills Wushu Association lem bad uwei pat na ka Meghalaya Association of Kickboxing Organisation. Kine ki dkhot ki dei artad ki nongïalehkai.
Halor ka jingkynnoh da ki kmie jong ki khynnah ïalehkai ba katei ka synjuk ka la dawa pisa na ki khynnah, ka Lorenza ka la pynpaw, “Ha ka jingshisha ïa kane ngi la pynpaw ha ka jingïalang bad ki kmie ki kpa jong ki khynnah ba lada ki khynnah ki ïoh ïa ki song jingïarap na ka Sorkar ki dei ban ai kumba 10% na ka 100 jong ka khusnam pisa (Cash Award) bad sa T. 500 tyngka na ka scholarship jong ki khynnah.”
“Kane ka jingpynpaw ka jong ngi ka long ban ai jingïarap sha kiwei pat ki synjuk ïalehkai Martial Arts bapher bapher kum ka Karate, Jeet Kune-Do, Wushu, Kick Boxing nalor ki shlem ai jinghikai bapher bapher,” ka la bynrap ba ïa kine ym pat shym la rai ban shim pisa hynrei ka dang dei tang ka jingïakren ha katei ka jingïalang bad kam shym la don ka jingbyrngem ban weng noh ïa ki bym lah ban ai ïa kata ka pisa.
“Phi dei ban tip shai na baroh ki synjuk ïalehkai Martial Arts, dei tang ka Meghalaya Wushu Association kaba la ïoh jingïarap na ka Sorkar bad dei kane kaba la buh jingeh bha ïa ngi ki bor pynïaid. Kane ka jingpan pisa ka dei ruh ka jingpynlut ïa ki tiar ïalehkai kum ki tracksuits bad kiwei ki jingdonkam jong ki khynnah ïalehkai haba ki leit ïashim bynta shabar Jylla.”
Haba ïadei bad ka jingleit ïashim bynta sha Dehradun, kine ki nongïalam ki la pynpaw ba kim shym la don jingtip eiei ba kam shym don ka kyrdan ïalehkai jong ka Sub-Junior. “Ha ka jingshisha haba ngi leit ïashim bynta sha ki lympung ïalehkai shabar jylla (national), bunsien hi ïa ka Sub-Junior la ju kynthup lang ha ka Cadet. Hynrei ha katei ka jingleit ïashim bynta ha ka All India KIO Natiuonal Karate Championship kaba la long ha u bnai Jymmang mynta u snem sha Dehradun la thoh shai na ka bynta ka Cadet kaba kynthup lang naduh ki Sub-Junior, Junior bad Senior, hynrei ka la long da khongpong ha kaba ki khynnah kiba dangrit ki la duh shim bynta,” la pynpaw ka Kong Bajopkin Kharmudai (Coach).
Halor ka jingkynnoh ba ka Kong Bajopkin kam pat pass kum ka Coach, hynrei ka la ïoh ïa ka syrnod kum ka Coach ha katei ka lympung, ka Kong Kharmudai ka la ong ba kane ka kyrdan coach ka dei tang ka Identity Card (ID) kaba kut noh tang ha katei ka lympung namar ka jingbym lah ban ïadon lang u Bah Donny Raphael Ranee bad ka kynhun.
“Ha ka jingshisha ngam pat pass kum ka Coach, hynrei nga dei tang ka Official namar ha katei ka lympung ym lah ban rung sha Stadium khlem da dei ki coach ne ki official.”
“Kane ka ID ba la ïoh da ka Kong Bajopkin kum ka Coach ka dei na ka daw ba i Sir Donny im shym la lah ban ïadon lang bad ka kynhun ha ka jingleit sha Dehradun,” la pynpaw ka Lorenza Songthiang, kaba dei ka khun jong u Bah Ranee bad ka Kong Anita Songthiang.
Ha kajuh ka por ka Kong Bajopkin ka la pynpaw ba ka dei ka nongïalehkai ha ka State Level bad ha kajuh ka por ka dei ruh ka nongtrei Asha nalor kiwei kiba ka la ïadon bynta ha ka imlang sahlang.
Halor ka jingkynnoh ai syrnod thok da ka takma rupa ïa uwei u khynnah uba la shah rem ha Dehradun, ka Meghalaya State Karate Do Federation (MSKDF) ka la pynshai ba kum ka synjuk kam ju ai syrnod thok thok ïano ïano, hynrei haba leit ïashim bynta ki don ar tylli ki syrnod bad kata ka long ka syrnod ba leit ïashim bynta (participation) bad ka syrnod ba ki khur takma.
