Shillong, Naitung 11
Ka Sorkar Jylla kan khreh ban plie biang ïa ka stadium kaba la rim tam ha ka Jylla kata ka Jawaharlal Nehru Stadium kaba don ha Polo lyngba ka jingwan ka 133rd Durand Cup 2024 ka ban pynïaid da ka Eastern Command jong ka Indian Army.
Kane kan long ka sien kaba nyngkong eh ban pynlong ha ka nongbah Shillong ïa ki kato katne ki jingïalehkai, nalor ka Jamshedpur, Kokrajhar bad ka Kolkata ha kaba yn ïashim bynta da 24 tylli ki kynhun na ka Indian Super League, I-League, kumjuh kiwei kiba la shah khot sngewbha ryngkat bad katto katne ki kynhun ïalehkai jong ki shipai.
Ïa kane ka lympung ïalehkai yn sdang naduh 27 tarik mynta u bnai. La pyllait ïa ki trophy da ka President ka ri ka Draupadi Murmu ha ka sngi Balang ha Rashtrapati Bhawan Cul-tural Centre kaba ha nongbah Delhi bad mynta kine ki trophy kin ïaid kylleng ki jylla jong ka ri.
Haba ïakren bad ki nongthoh khubor ha ka sngi Palei, u Commis-sioner & Secretary ka tnat ïalehkai ka Sorkar Jylla u Dr. Vijay Kumar u la pynpaw ba ka J.N Stadium kaba la khangdam biang ïa ka mynta la katto katne snem namar ka jingmaramot bad tei shuh shuh ïa ki jingtei kiba donkam hapoh jong ka, kum shi bynta ban pynlong noh ïa kane ka madan kum kawei na ki madan ïalehkai kaba janai bad paka na ka bynta ban pynlong ïa ki lympung ïalehkai ba kham heh.
U Dr. Vijay u ïathuh ba mynta ka sngi ka la don ka jingïalang shong pyrkhat kam ryngkat bad ki briew kiba dei napoh ka tnat shipai jong ka ri, ban shim ïa ki lad ki lynti ba da kumno ban lah ha ka ban pynïaid shakhmat ban pynlong ïa kawei na ki jingïalehkai (Group Stage) jong kane ka lympung.
Haba jubab ïa ka jing-kylli halor ka jingleit khynra jong ka KSU ïa ki bar Jylla kiba la wan ban trei bylla ha kane ka stadium, u Dr. Vijay wat la um shym la jubab lut ïa kaei kaba la kylli hakhmat ka jong u, tangba u la ïathuh pat kumba ka long ïa mynta, la lah ban teh-lakam ïa kane. Na ka liang u Chief Secretary ruh u la shim khia da kaba la ïakren bad ka Director General of Police ka Jylla bad kum kine ki jingpynkhreh u kyrmen ba kan nym don shuh kano kano ka jingshah pynthut ne buh jingeh ïa ka Sorkar jylla ha ka ban pynlong ïa kane ka lympung mynta ka snem.
