Phulbari, Naitung 11
Ka thaiñ rithor ba hap ha West Garo Hills (WGH) ka dang shah ktah haduh mynta na ka jingther jong u slap ba jur kaba la wanrah ka jingshlei um ha ka wah Rongai bad kaba dang buh ha ka jingma ïa ka shnong Chibinang bad ki jaka ba marjan ha ka thaiñ Phulbari.
U MLA ka thaiñ u AT Mondal uba dei ruh u Myntri ka Sorkar Jylla uba dang don mynta ha Phulbari ban peit ïa ka jinglong-jingman u la ong, ba ka jinglong- jingman ka la ïasyriem thik kumba la jia ka jingshlei um ha u snem 2014, ha kaba ka la wanrah ka jingduhnong kaba khraw, ka jingduh ïa ki mynsiem briew bad ki jingdon jingem.
Ka wah Rongai kaba don marjan bad ka Rongram ka dang bteng ban ïaid lyngba kiba bun ki bynta jong ka Dadenggre Sub-Division shwa ba kan ïakynduh bad ka Chibinang ban poi pat sha ka wah Brahmaputra.
Ka um ka la nang tap ïa kiba bun ki jaka ha Chibinang bad ruh ha ki shnong kiba marjan bad ha kaba kiba bun ki surok ruh ki la shah tap ha ka um. Haduh ba thoh ïa kane ka khubor ym pat don dak satia ba ka um kan hiar.
Kumjuh ka Phulbari ka la sakhi ïa ka jingkiew jong ka um, ha kaba kiba bun ki nongshong shnong ki la pynpaw ba ka jingkiew jong ka um, ka la nang kham heh ban ïa kaei kaba la sakhi mynshem taïew ha ka por ba la wan jurip da u Myntri Rangbah ka Jylla u Conrad Sangma. Ka Mankachar ha South Salmara jong ka Assam ruh ka dang bteng ban sakhi ïa ka jingkiew jong ka um kaba la tam ruh wat ïa u dak jong ka jingma ha kine ki taïew bad la antad ba ka um kan dang jur ban wan sha ki bynta ba sharum, bad la sngewthuh ruh ba ka jinglong jingman kan nang sniew shuh shuh.
“Ka jinglong jingman ka la ïasyriem thik kum kaei kaba la jia ha u snem 2014, ha kaba ka jingshlei um kaba shyrkhei bha ka la ktah ïa baroh ki thaiñ ha Chibinang bad ki shnong ba don marjan. Kiba bun ki shnong ki la don lypa hapoh ka jingdap um. Ngi la ïakren bad ki bor pynïaid district ban pynthikna ba kiei kiei baroh kin don hapoh ka jingbit jingbiang bad ruh ban shimkhia bad pynbit pynbiang ïa kito kiba la shah ktah,” la pyntip u Myntri.
U AT Mondal uba la hiar ban jurip ha kiba bun ki jaka kiba la shah ktah, u la pyntip ba ka jingshim kheiñ halor ka jinglong jingman ka dang ïaid shakhmat.
Halor kane, la dep ban pynbna ïa ki lad jingïarap kiba mardor da ki bor pynïaid district ha ka taïew ba la lah, hynrei namar ka jingantad ba ka jinghap slap kan dang neh bad jur ha kine ki sngi ban wan, ka jinglong jingman ka dang sniew.
