Shillong, Naitung 12
U nongïalam ka Congress uba dei ruh u MLA bad MDC ka Mylliem konstitwensi, u Bah Ronnie V Lyngdoh u la buh jingkylli ïa kito kiba kynthoh ïa ka Congress ruh ka dei ka BJP namar ka ïatreilang bad ka NPP ha Khasi Hills Autonomous District Council (KHA-DC).
U Bah Ronnie u la ai kane ka jingkynthoh ïa ka VPP halor ka jingshah kynthoh ki seng kiba ïatreilang ha KHADC kynthup ïa ka Congress.
“Ki mat jong kita kiwei ki seng ka long tang ban kdew kti ïa kiwei pat ki seng, hynrei kano-kano kaba ngi leh, ngi buh shwa ïa ka jingmyntoi jong u paidbah, ym shi-met ne ïa ka seng. Lada kita kiwei ruh ki ong ba ki kyrshan ïa kano-kano ka kynhun ban wanrah kam pynroi, kaba mut ba lada ka long ïa phi ban kyrshan ïa ka BJP na ka bynta ki kam pynroi, balei kam long ïa kiwei pat ban kyrshan,” la ong u Bah Ronnie haba kynthoh ïa ka jingong ka VPP ban kyrshan ïa ka NDA na ka bynta ki kam pynroi ha Meghalaya.
U la ong ba ka Congress ka la ïatreilang ha KHADC bad ka NPP ym bad ka BJP, bad ka jingïatreilang ka Congress ka don ka daw namarba lada ym lah ban thaw ïa ka Executive Committee ha kato ka por, ka lah ban wan ka jingsynshar da u Lat bad lada ym don ka Executive Committee, kan buh jingeh khamtam ha kato ka por ba ka Sorkar Pdeng ka la dei ban wanrah ïa ka jingpynkylla ïa ka Sixth Schedule.
Hynrei u la ong ba lada don da ka Executive Committee kaba ïalam da ki nongmihkhmat kiba la jied da u paidbah yn dang lah ban leh eiei.
Halor ka jingdon ka VPP ha ka Liang Pyrshah ha Parliament khlem da donlang bad ka kynhun INDIA, u Bah Ronnie u la ong ka VPP ha ka ilekshon ban jied ïa u Lamphang ka Lok Sabha kam pyrshah satia.
“Ka long thamula namarba lada leh ma ki ka long, hynrei lada leh kiwei kam long. Ka Congress ka don bad ka NPP ha KHADC ym ba ka donlang bad ka BJP,” u la ong.
U Bah Ronnie u la kynthoh ruh ïa ka VPP halor ka Article 371 da kaba ong, “ngam lah ban sngewthuh namar kajuh ka seng kaba ong pynduh ïa ka District Council, kajuh ka seng kaba kwah ban ïakhun ïa ka ilekshon District Council. Ka Sixth Schedule ka dei kaba biang tam namar lada wan ka Article 371 ka jingkylli ka long, ka Panchayati Raj ka treikam ne kam treikam ha kane ka Jylla.”
U la ong ba ka Sixth Schedule ka long ka jingshngaiñ ha ka liang ki riti ki dustur bad ki Dorbar Shnong namar lada wan da ka Panchayati Raj lei lei kan don sa ka Panchayat ilekshon bad kin don shibun ki jingkylla bad jingeh.
