Beijing, Naitung:
ka Myntri Rangbahduh jong ka ri Bangladesh, ka Sheikh Hasina, ka la leit poi sha China naka bynta ki 4 sngi ki jingleit jurip jongka sha katei ka ri ban ioh iamir jingmut bad ban pynskhem kam bad ki nongialam ba ha khlieh duh jong ka China, kiba kynthup ia u President Xi Jinping bad u Myntri Rangbahduh jong ka ri, U Li Qiang bad ban nang ioh pynskhem shuh- shuh ia ka jingiadei kaba kongsan hapdeng kitei ki ar tylli ki ri.
Ha ki jingleit ïakynduh ba kyrpang jong ka bad u Xi kumjuh ruh bad u Li ha ka sngi Thohdieng, kitei ki heh nongialam ki la ioh ban iakren halor ki mat ba kongsan ban kyntiew ia ka jingiatrei lang bad ban nang pynskhem shuh-shuh ruh ia ka jingiadei hapdeng kitei ki ri.
Kane ka jingwan jngoh jong ka myntri rangbah ka ri Bangladesh sha China ka long tang hapoh 15 sngi hadien ka jingwan jngoh kaba khatduh jongka sha India naduh ka 21 haduh 22 tarik u Jylliew.
