Shillong, Naitung 12
Ka khubor kaba la ïohlum lyngba ka ‘Website’ ki pulit ka jylla ka ïathuh ba u Kampher Mylliemngap u la ujor ba ha ka miet jong ka 9-10 tarik Naitung, ki runar ki la tuh ïa thuk-thuk jong u (ML-05Y-0420) na ka ïing sah jong u hi kaba don ha Smit Pdengshnong, East Khasi Hills.
Ha kawei pat ka khubor, ki pulit ki la ong ba ha ka 10 tarik Naitung ha ka por kumba 9:30 mynmiet, ki nongshong shnong ka Umphyrnai, East Khasi Hills, ki la ïoh kem ïa arngut ki briew halor ka jingkynnoh ba ki la donkti ban tuh ïa ki shaka kali na kawei ka kali kaba la pynïeng ha Lumjingsuk, Madanrting.
Nalorkata, ki pulit ki la ïathuh ba u Sheikh Abdullah u la ujor ba ha ka 10 tarik Naitung ha ka por kumba 4:30 janmiet, ki runar ki la tuh ïa ka thuk-thuk jong u (ML-08J-4203) na ka shnong New Bhaitbari ha West Garo Hills.
Sa ha kawei pat ka jingjia, u Sunit Rabha u la ujor ba ha ka 10 tarik Naitung, ki runar ki la tuh ïa ka thuk-thuk jong u (AS-18L-4296) na steshon rel kaba don ha Mendipathar, North Garo Hills.
Shuh shuh ki pulit ki la ong ba ha ka 9 tarik Naitung, ki pulit ki la ïoh kurup ïa kawei ka ar shaka (AS-01EA-3891) na Nengkram Bazar kaba hap hapoh ka Mangsang Outpost, East Garo Hills. La suba ba ïa kane ka ar shaka la iehnoh da uwei u briew ïa uba la tip kyrteng kum u Sengsrang Sangma. Ha ka jingtohkit, ki pulit ki la shem ba katei ka ar shaka ka dei jong uwei pat u briew ïa uba la ithuh kum u Mridul Rabha bad la pyntip ba ka dei ka ar shaka kaba la shah tuh na Assam ha ka 5 tarik Naitung. Na ka liang ki pulit ki la aiti noh ïa katei ka ar shaka sha ki pulit Assam.
