Shillong, Naitung 12
Ka Umïew Maw U Sam ka la pynliem noh ïa ka Mawlyngngad SC da 3-2 kol na ka bynta ban ïoh jingjop ha ka SSA Under-20 Fourth Division kaba la long ha ka Sngi Thohdieng ha madan Polo.
Ïa kine kol la thep da u Aiboklang L Nongbri ha ka minit kaba 12, Bilistar Sun (17) bad u Eller C Allya (70+2), katba na ka Mawlyngngad la thep da u Edelbert Kharmalki (4) bad u Banskhem Kharkongor (43).
Haba phai sha kawei pat ka jingïakhun hapdeng ka Mawpdang SC bad ka New Challenger SC ki la ïasam mar shi point hadien ba ïakhaid mar 1-1 kol. Ka Mawpdang ka la pynkhih jar nyngkong eh lyngba u Mickey Marweiñ (57), hynrei ka New Challenger ka la lah ban pynïakhaid kylla lyngba ka jingïarap pynthep da u rangïalehkai ka Mawpdang u Shanbor Swer (65).
Ka jingïalehkai ha ka Sngi Saitjaiñ kan long hapdeng ka Thynroit SC pyrshah ïa ka Madanryting SC ha ka por 4 baje janmiet ha madan MFA.
