Shillong, Naitung 12
U coach ka Langsning FC, u Khlain Pyrkhat Syiemlieh u la shimti kum u coach ka Bodoland FC, la pynbna kane ka klob dangshen.
Ïa kane ka klob la seng ha u snem 2022, hynrei ka la ïoh ban ïashim bynta ha ka Durand Cup 2023 bad mynta u snem kan ïashim bynta biang ha kane ka lympung ka ban sdang ha ka 27 tarik mynta u bnai.
Wat la u Khlaiñ (AFC A Licence) u dei uba la shimti ïa ki klob jong ka nongbah kum ka Rangdajied United FC, Ryntih SC, Mawlai SC bad ka Langsning FC, u lah ban shimti ïa kane ka klob tang ha katei ka lympung.
Kumba ka paw ka Bodoland FC ka la don ha ka Group-E kaba kynthup lang ïa ki klob jong ka Indian Super League kata ka Odisha FC bad ka NorthEast United FC lem bad ka kynhun jong ka Border Security Force.
Ïa ki jingïalehkai jong kane ka group yn pynlong ha Kokrajhar kaba dei ka jaka ïalehkai ha la ïing jong ka Bodoland FC. Kane ka long ka sien ba ar ba ka Kokrajhar ka la ïoh ban pynlong ïa ka Durand Cup.
