Shillong, Naitung:
Ka Khasi Students’ Union (KSU) ha ka Sngi Ba-ar ka la dawa na ka Sorkar ba ka dei ban wad ïa baroh kito kiba la pyndep ïa ka jingpule doktor lyngba ka bhah Sorkar kiba khlem wanphai shuh sha ka Jylla.
“Kito kiba la dep pule doktor na ka bhah Sorkar – ngim lah ban len ba bun hi kiba ïoh da ka ‘Open Category’ khamtam ki bym dei ki Khasi. Ynda ki la pyndep ïa ka jingpule na ka bhah Sorkar, bunsien ki ju jah bad kim ju wanphai shuh ban ai ka jingshakri sha ki paid nongshong shnong ka Jylla,” la ong u Chairman ka Education Cell, KSU, samla Pynkmenlang Sanmiet haba kren sha ki lad pathai khubor hadien ka jingïakynduh bad ka Myntri ka koit ka khiah ka Jylla, Dr. M. Ampareen Lyngdoh.
U la ong ba kane ka wanrah ïa ka jingdkoh ha ki jaka sumar khamtam ha ki jaka nongkyndong ba kynthup ïa ki PHC, CHC, Sub-Centre bad kiwei-kiwei.
“Ngi la dawa na ka Myntri ba ka Sorkar ka dei ban wad ïa baroh kito kiba la pule na ka bhah jong ka Sorkar bad kiba khlem wanphai shuh sha ka Jylla, kumjuh kiba khlem siew ïa ka ‘Bond’ kumba ïateh bad ka Sorkar,” u la ong.
Ha kajuh ka por, u la ong ba ka Sorkar ka dei ban leh tyngeh ïa kum kine bad dei ban wad ïa ki khnang ban pyntikna ïa ka jingwanphai jong ki ban shakri hapoh ka Jylla.
Halor ka jingpan jingshai jong ka seng haba ïadei bad ka jingpynbeit ïa ka bhah pule doktor (MBBS), u samla Sanmiet u la ong ba ka Myntri ka la pynshai ba haduh mynta, ka eksamin NEET kaba ju pynlong ha baroh kawei ka ri ka dang don ha ïingbishar ba hakhliehduh ka ri bad ïa ka jingdon jong ki jaka haduh mynta kam pat lah ban ai.
Haba pynkynmaw halor ka jingjia ha u snem ba la dep halor ka jingbym beit haba ïadei bad ka bhah pule doktor jong ki samla pule, u la ong ba ki don ki samla Khasi kiba poi sha ka thup ‘Open Category’, hynrei ki duh noh ïa ka lad ban rung ha kane ka thup.
“Na ka liang ka Myntri ka la pynshai ba kan ym don shuh kaba kum kata bad kino-kino ki samla Khasi kiba poi sha ka thup ‘Open Category’, kum ïa kine yn shah ban rung,” u la ong.
Kumjuh halor ka jingjia ha Ri-lum Jaiñtia ha u snem ba la dep ha kaba uwei u bar Jylla u la aiti ïa ki kot ki sla da kaba thmu ba ïoh bhah lang na ka Sorkar, utei u nongïalam u la ong ba ka seng ka la kren shai bad dawa na ka Myntri ba ym dei shuh ban pdiang ïa ki kot ki sla jong kine ki bar Jylla kiba kam bad pyrshang tang ban ïoh rung lyngba ka bhah pule jong ka Jylla.
“Ngi la dawa ruh ba ka tnad ka dei ban bishar bniah bad pynshisha ïa ki kot ki sla jong ki nong aplai. Ka Sorkar ka dei ban long shai bad pyntikna ba ka jingjied ïa ki samla pule MBBS ka dei ban long kaba khuid ba suba khlem da don ka jingbuhrieh hangno-hangno,” u la ong.
Halor ka Medical College, u samla Sanmiet u la pynsngew sha ka Myntri ba ka Sorkar ka dei ban pynsted ha ka ban pynurlong noh ïa kane ka kolej khnang ba kan pynsuk ïa ki paidbah baroh kumjuh ïa ki samla kiba kwah pyntbit ïalade ha ka jingpule doktor.
Na ka liang ka Myntri haba kren sha ki lad pathai khubor, ka la ong, “Ka tnad Personnel bad Law ki dei ki bor ba dei khmih ban ai jingmut ïa kano-kano ka tnad treikam bad haba phai sha ka jingbhah na bynta ka jingpule katkum ka ‘Reservation Policy’, mynta ngi don ha ka kyrdan kaba biang ban pyntikna ba haba jied bad mang ïa ki jaka ha ki Medical College katkum ka ‘Reservation Policy’, ngim dei ban pynkheiñ, bad ngim dei ban pynduh jingmyntoi ïa ki nongïoh jingmyntoi, bad ngin bud ryntih ïa kane.”
“Kum ban shu ai nuksa, u lah ban don uba aplai uba don ïa ka jait trai-ri hynrei u bym dei u nongshong shnong ba pura ka Jylla bad u bym don ka syrnot ST. Ngin leh kumno ïa kine, hato ngin shim ïa ki tang naba ki don ïa ka jait trai-ri ne ngin ñiew ïa ki kumba long lem kiwei pat kiba aplai,” la ong ka Myntri.
Shuh shuh ka la bynrap ba kine ki long kiei-kiei kiba hap ban pyrkhat sani bha bad ym dei ban shim rai da lade hynrei dei ban ïoh ïa ka jingkdew lynti bad ki jingai jingmut kiba biang na ka tnad Personnel bad Law khnang ban pyntreikam ïa kane na bynta ki samla pule kiba aplai na bynta ka jingpule doktor bad ban pyntikna ba ka bud ïa ka aiñ bad ka mat treikam jong ka Jylla.
Na ka liang ka Myntri ka la kular ruh ban shimkhia halor ka mat bad ïadei bad kito ki bym wanphai shuh sha ka Jylla hadien ba la pyndep ïa ka jingpule.
