Shillong, Naitung 12
U Jose Carlos Rodriguez Hevia u la wanphai biang sha kane ka nongbah na ka bynta ban shimti biang kum u coach ïa ka Shillong Lajong FC, la pynbna kane ka klob ha ka Sngi Thohdieng.
Kane ka jingpynbna ka la wan hadien ba u Bah Bobby L. Nongbet (coach) u la shimti noh kum u khliehduh jong ka Youth Development jong kane ka klob.
U Rodriguez uba la don bad ka Lajong naduh u snem 2019, ha kaba la thung ïa u kum u technical director hynrei u la lah ban pynurlong ïa kane ka klob ba kan rah ïa ka nam lahduh ha ka Shillong Premier League bad ha ka Meghalaya State League ha u 2019. Ka jinglong jong u bad ka sur kaba sngewtynnad ka la pynlong ïa u ban ïoh ïa ka jingjop.
Utei u coach na Spain u la hap ban pynkut noh ïa ka kontrak ha ka shiteng jong u snem 2020 na ka daw ka jingwan lynshop ka khlam Covid-19. Hadien kata u la wanphai noh sha la ïing. Hynrei hadien u la wanphai biang sha India na ka bynta ban shimti kum u coach ba hakhmat eh jong ka Mohammedan Sporting. Pynban ha kata ka jingïakynduh ka la neh tang katto katne bnai shuwa ba ma u bad ka klob kin ïakhlad lok noh.
Kumba ka long mynta ka Shillong Lajong ka dangdon ha ka jingpynkhreh ban ïashim ha ka Durand Cup mynta u snem, hadien kan bteng biang ïa ka lympung ïalehkai I-League bad ka Super Cup naduh u Risaw mynta u snem.
Wat la ka Lajong ka la khmih lynti ban ïoh rung ha ka thup kaba san jong ka I-League 2023-24, hynrei ha kane ka kynhun ïalehkai na ka nongbah ka la wan ha ka kyrdan baphra.
