Shillong, Naitung 12
Ka prokram wad ïa ki khynnah kiba don ïa ki sap ïalehkai kyrpang kaba hap hapoh ka Khelo India Rising Talent Hunt (KIRTI-MyBharat) ka ban bishar bniah ïa ki samla kiba dang don sap khnang ba kin ïoh ka jingshah hikai hapoh ki shlem ai jinghikai kiba don ha kylleng jong ka ri.
Ha kane ka KIRTI (My-Bharat) yn jied ïa ki khynnah ha ki jingïalehkai Athletics bad Football ka ban pynlong ha Nativity Higher Secondary School ha Mawkyrwat ha ka 18 bad 19 tarik mynta u bnai. Ka jingpynrung kyrteng na ka bynta ka prokram wad ïa ki sap ïalehkai kan sdang naduh ka por 9.30 mynstep haduh ka por 1 baje mynsngi bad ka jingbishar bniah kan long haduh ka por 6 baje janmiet.
Kane ka prokram kan don ïa ka jingpeit bniah ïa ka met (ki jingthew ïa ka koit ka khiah) lyngba ki tiar ki tar ka juk mynta bad ki jingthew kyrpang na ka bynta ki jingïalehkai da kaba pynshong nongrim ha ka jing-tbit ha la ki jong ki rta ïalehkai. Kane ka kyrwoh ka la wan na u T.S. Chavhan, Deputy Director ka SAI, STC, Shillong.
