Tura, Naitung 14
U MLA ka TMC na Rajabala, u Mizanur Rahman Kazi ha ka Sngi U Blei u la kyrpad ïa ka komiti ki ‘riewshemphang ne ka ‘Expert Committee’ halor ka bhah thung kam ban ai bhah 5% haba ïadei bad ka kam ka jam na ka thup ‘General Category’ na bynta ki ‘Deshi Muslim’ jong ki jaka thor, khlem da pynthut pat ïa ka bhah na bynta ki jaidbynriew trai-ri – Khasi, Jaiñtia bad Garo.
U Kazi, haba phah ïa ki jingai jingmut jong u sha ka komiti ka bhah thung kam, u la pynkynmaw ïa ka khana mynbarim jong ka thaiñ da kaba kdew ba ki ‘Deshi Muslim’ ki long ki nongshong shnong ba shisha jong ka thaiñ bad bun bah na ki Muslim ki la kylla na ki Rajbongshi. U la ong ruh ba ki ‘Deshi Muslim’ ki long ka bynta kaba kongsan jong ka imlang-sahlang bad ka jingbun briew ka Ri-lum Garo bad ka Jylla, bad ki ju synñiang barabor sha ka roi ka kiew jong ka Jylla da kaba pynneh ïa ka nongrim ‘Unity in Diversity’.
Haba pynkynmaw ba kiba bun ki nongïalam napdeng ki Muslim ki la mihkhmat bad shakri ïa ka Jylla bad District Council, la ka long ha ki por ba la dep bad mynta, u Kazi u la kyntu ïa ka komiti ban ai jingmut sha ka Sorkar Jylla ban pyrkhat ïa ki kyndon ba ïadei bad ka imlang-sahlang bad ka ïoh ka kot jong ki kum ka jaidbynriew bad ban ithuh ïa ki kum sa kawei ka Backward Class (OBC) bad kumta ban bhah lem 5% sha ki na ka ‘General Category’.
