Shillong, Naitung 14
Ka Elaka Laitlyngkot ha ka Sngi Saitjaiñ ka la ai sngewbha ïa ka jaka ban tei ïa ka shlem pule jong ka Shillong College na bynta ka jingmyntoi jong ki samla pule hapoh thaiñ baroh kawei.
Ha kane ka sngi, ka la don ruh ka jingsoi ïa ka soskular ka jingïateh hapdeng ka Governing Body jong ka Shillong College bad ki khlieh nongsynshar ka Elaka Laitlyngkot bad hadien kane, la aiti ïa ki kot ki sla ne ‘patta’ jaka sha ka kolej.
Haba ai jingkren ha ka jingïalang buh mawnongrim, ka Principal ka Shillong College, ka Dr. E. Kharkongor ka la ong ba ka Shillong College ka la sdang tang da 38 ngut ki samla pule na Shillong Jail Road School ha u snem 1968.
Ka Dr. Kharkongor ka la ong ba ka kolej ka la kynriah sha ka jaka ba mynta ha Laitumkhrah ha u snem 1971 bad ha u snem 1983, la ithuh ïa ka kum ka ‘Grade-A College’.
Katkum ka jingïathuh ka Principal, ka kolej ka ai jingshakri ïa kiba bun bah ki samla pule na ki jaka nongkyndong jong ka Jylla khamtam na Pynursla bad ki jaka ba marjan kum ka Laitlyngkot.
Ka kyrmen skhem ba ha ryngkat ka jingïatreilang jong baroh ba kynthup ïa u MLA, ka jingtei ïa ka kolej kan sa sdang noh shen da kaba bynrap ba shisien ba ka kolej ka la ïeng, kan wanrah jingmyntoi shi kat dei khamtam ïa ki nongshong shnong ka thaiñ bad ka Jylla hi baroh kawei.
U Prof B. Myrboh, President ka Governing Body jong ka Shillong College u la ong ba ha ka jingïaid lynti jong u kum u nonghikai, u la ïakynduh ïa bun ngut ki samla pule don sap na ki jaka nongkyndong.
“Lada shna ïa ka kolej ha kine ki thaiñ, kin sa nang bun shuh ki ‘riew donsap ki ban mih nangne,” u la ong.
Ha kawei ka liang, u MLA ka Sohra, u Bah Gavin M. Mylliem uba la ai jingkren ha katei ka sngi kum u kongsan u la ong ba kane ka dei ka jingangnud kaba la slem jong ki paidbah hapoh ka Elaka Laitlyngkot bad ki jaka ba marjan.
U Bah Mylliem u la kdew ban pynïaid ïa ka shlem pule kam dei ka kam kaba suk bad bynrap ba ïa mynta, ka Elaka Laitlyngkot ka pynïaid ïa ka Kyntiew Shaphrang Higher Secondary School bad ban pynmih ïa ka tulop ki nonghikai, ki hap ban pynlong da ka ‘Fete’.
U la ong ruh ba ma u lem bad ki paid nongshong shnong ka Laitlyngkot ki sngewnguh shi kat dei ïa ki bor pynïaid ka Shillong College na bynta ban pynïeng ïa ka shlem pule hapoh ka thaiñ.
“Phi don ïa ka sap ka phong kum ki nonghikai bad ki bor pynïaid kiba la pyntbit bha,” la ong u Bah Mylliem.
U la ong ruh ba ka thaiñ Laitlyngkot ka long ka jaka pdeng bad kiba bun kiba pule mynta ha Shillong (Shillong College) ki dei na Pynursla, Laitlyngkot bad ki jaka ba marjan.
U la ong ruh ba ka jingdon jong ka Shillong College ha Laitlyngkot ka long kaba donkam na bynta ki samla pule na ki jaka ba marjan ban bteng ïa ka jingpule jong ki.
U la bynrap ba ki samla pule na kine ki thaiñ ki hap ban sangeh noh shiteng por ïa ka jingpule hadien ka klas XII naba ki kmie ki kpa kim kot bor ban phah pule ïa ki sha Shillong.
Shuh shuh u MLA u la ban jur halor ka jingdonkam ban rah ïa ki shlem pule khamtam ki kolej sha ki jaka ba kyndong jong ka Jylla kumba long lem ki distrik bad Sub-Division kiba la shna ban pynsuk ïa ki paidbah.
