London, Naitung:
Katkum ki khubor la iathuh ba ka Britain kan sa pyllait noh da ki hajar ngut koidi naduh u Nailur khnang ban pynduna ia ka jingbun palat koidi ha man ki patok ha kylleng jong katei ka ri. Ia kane la pynbna da u Myntri tnad Ain ba thymmai jong ka UK ha ka Sngi Palei.
Ka Shabana Mahmood ka la ong ba ka jingbym lah ban leh kumta ka buh jingma ïa ka jingbym lah ban pyntreikam pura ia ka aiñ ban wanrah ia ka shongsuk- shongsaiñ hapoh ka ri, namar la ong ba lada buh jingkheiñ antad ia ka jingngiam briew hapoh ki patok kiba don ha kylleng ka ri baroh kawei, kan ioh jaka sa tang kumba 700 ngut ki koidi namar kumba 99% tylli ki patok ki dei kiba la bun koidi lypa.
Ka England bad ka Wales ki long ki ri kiba bun briew tam hapoh ki patok ha ri Europe Sepngi. Bun na ki patok ha kitei ki ri ruh ki la sdang ban khapngiah bad la donkam ban pyn thylli noh khnang ban ioh set ia kiwei pat ki runar kiba dang ioh kem shen bad ioh bat man la ka sngi ha ki jingjia bad jingleh kam pynkheiñ aiñ bapher bapher.
Hynrei ha kawei ka liang ki bor pynïaid kin ym pyllait kulmar ia baroh ki koidi pynban kan shu jied tang ia kito kiba don dak sniew ha ki kam barit-baria bad ka patok kan long hi na ka bynta kito ki nongleh kam sniew kiba la shah set patok palat saw snem, ki nongleh sniew ne kiba don kti ha ki kam batbor bad ki kam shongkha- shongman kumjuh ruh ia kito kiba don ha patok namar ki kam lehbein ha iing ha sem bad ia kito kiba la dep rai ban set patok shi jingim, yn nym lah shuh da lei-lei ruh ban pyllait ne pynduna ia ka por shong patok
jong ki.
U heh ba dei khmih ia ki patok ha UK, u Charlie Taylor, u la ong ka long kaba donkam ban rai kyrkieh noh halor kane ka kam namar ki patok ki la khapngiah lut bad ym don jaka shuh ban thep ia ki runar ki ban shah kem thymmai lashai- lashisngi.
U Mahmood, uba dang shu ioh bat shen ia katei ka kam hadien ka jingseisoh ka jong u na ka ilekshon kaba dang shu dep ha katei ka ri, ha kane ka kynti u la ong ba lada ki ophisar kim lah ban leh ei ei, ki nongleh kam sniew ki lah ban leh katba ki kwah khlem kano kano ka jingshah ktah. Nalor kata, ki paidbah kin sa hap ban mad ia ki jingjia kiba ha rukom naduh ki kam lute bad kam tuh- kam thiem, kiba long ruh ka jingma kaba khraw ia ki paidbah nongshong shnong hi lada ym lah ban tehlakam noh ia kum kine kiei- kiei naduh kane ka por ba mynta.
