Shillong, Naitung 14
U Carlos Alcaraz jong ka Spain, uba dang 21 snem ka rta, u la pynliem noh ïa u Novak Djokovic jong ka Serbia, uba la don 37 snem ka rta, ha ka jingïalehkai final jong ka lympung ïalehkai tennis bad ban rah biang ïa ka nam lahduh Wimble-don kaba u la rah teng mynshem snem.
Kane ka final ka la pynkynmaw biang ïa ka final jong u snem 2023. Hynrei mynta ka kynti, u Djokovic um shym la lah ban pynpoi shaduh ka set kaba san kumba u la leh ha ka final jong u snem ba la lah.
U Alcaraz u la lah ban pynliem noh ïa u Djokovic tang ha ki lai tylli ki set kata ban jop da 6-2 6-2 7-6 (7-4).
U Djokovic uba la pynlehnohei ka kabu ksiar ha u snem ba la lah ban ïoh pynryngkat ïa ka rikod kaba la buh da u Roger Federer ban jop haduh phra tylli ki nam lahduh ka Wimbledon, ha kane ka kynti ruh u la duh biang ïa kane ka kabu hadien ba u la shah rem biang ha ka final.
U Djokovic uba la khur haduh 24 tylli ki nam lahduh kiba heh ha ka tennis lane ki khusnam Grand Slam, ha kane ka sien ruh u la pyrshang ban jam shakhmat ban long uwei na ki rangïalehkai ban khur bun eh ki nam lahduh jong ka jingïakhun para marwei hynrei um shym la lah hadien ba u la shah rem noh ha ka final.
Hadien ba la shah rem noh, u Djokovic u la wan shakhmat ban ai khublei ryngkat ka jingphuh sam rkhie ïa u Alcaraz uba la lah ban pynliem da kaba suk ha kane ka kynti. Haduh mynta, u Alcaraz u la jop saw tylli ki Grand Slam.
